![](img/news/36/95/55/default.jpg)
Հայաստանն ընտրվել է որպես Eurasia Mobile Challenge–ի տարածաշրջանային երզափակչի անցկացման վայր, քանի որ այդ երկիրը մեծ միջազգային կապեր ունի, եւ այստեղ շատ երիտասարդ ձեռներեցներ կան։ Այս մասին հունվարի 25-ին՝ Երեւանում Eurasia Mobile Challenge նորարարությունների միջազգային մրցույթի տարածաշրջանային եզրափակչի ժամանակ, լրագրողներին ասաց Վիմպելկոմի Եվրասիական տարածաշրջանի ընկերություններ խմբի գլխավոր տնօրեն Միխայիլ Գերչուկը։
«Հայաստանը շատ լավ կապված է մյուս երկրների հետ։ Նա բարեկամական հարաբերություններ ունի շատ երկրների հետ, որտեղ մենք ներկայացված ենք»,– ասաց նա։
Գերչուկի խոսքով՝ Eurasia Mobile Challenge–ը ստարտափների ամենամյա համաշխարհային մրցույթ է՝ ուղղված նոր բիզնեսների թարմ գաղափարներին։ Ժյուրիի անդամները հաջողակ ձեռներեցներ եւ ներդրողներ են։
«Նման մրցույթներին մասնակցությունն արժեքավոր է 2 պատճառով։ Իրենց գաղափարները ցուցադրելու եւ հաջող ձեռներեցների հետ շփվելու հնարավորություն»,– հավելեց Գերչուկը։
Նա նշեց, որ մրցույթին ներկայացված առաջարկներում դոմինանտ ֆոկուս չկա։
Նշենք, որ «ՎիմպելԿոմ» ընկերության կազմակերպած մրցույթի նպատակն է գտնել բջջային, ֆինանսական եւ digital ծառայությունների ոլորտում թասրմ գաղափարներ։ Տարածաշրջանային եզրափակիչ փուլին մասնակցում են 8 երկրների 24 թիմեր։ Հաղթող թիմերը կհրավիրվեն Բարսելոնում Համաշխարհային բջջային կոնգրեսին (Mobile World Congress 2017) մասնակցելու, որը կկայանա 2017-ի փետրվարի վերջին։