Քննչական կոմիտեն նոր մանրամասներ է հաղորդել Կապանի հիվանդանոցում տեղի ունեցած բռնաբարության փորձի դեպքի վերաբերյալ:
Ըստ պաշտոնական հաղորդագրության, հունվարի 18-ին Կապանի 18-ամյա բնակչուհուց հաղորդում է ստացվել, որ գիշերը ժամը 03:00-ի սահմաններում Կապանի բժշկական կենտրոնի բժիշկը փորձել է սեռական ոտնձգություն կատարել իր նկատմամբ։
Պարզվել է, որ երիտասարդ աղջիկը բժշկական օգնության նպատակով «Կապանի ԲԿ» է տեղափոխվել հունվարի 16-ին. նախնական տվյալներով՝ անձնական խնդիրների պատճառով նա փորձել է ինքնասպան լինել՝ խմելով մեծ քանակությամբ դեղահաբեր եւ տեղափոխվել բժշկական կենտրոնի վերակենդանացման բաժանմունք։ Հունվարի 17-ի ուշ երեկոյան հիվանդը տեղափոխվել է բժիշկների սենյակ, որտեղ էլ, ըստ հաղորդման, հունվարի լույս 18-ի գիշերը, բժիշկներից մեկը փորձել է սեռական ոտնձգություն կատարել, ինչին դիմադրել է, կծել բժիշկի ձեռքերը, հրել նրան։
Նյութերի նախապատրաստման ընթացքում բացատրություններ են վերցվել հարազատներից, բուժանձնակազմից, կատարվել դեպքի վայրի զննություն, նշանակվել դատաբժշկական փորձաքննություններ: Նկատի ունենալով, որ հաղորդումը պարունակում է հանցագործության հատկանիշներ՝ Սյունիքի մարզային քննչական վարչությունում հարուցվել է քրեական գործ՝ 2017թ. հունվարի 25-ին ՀՀ քրեական օրենսգրքի 34-138-րդ հոդվածի 2-րդ մասի 8-րդ կետով։
Ձեռնարկվում են անհրաժեշտ քննչական գործողություններ՝ հաղորդման մեջ մատնանշված հանգամանքների օբյեկտիվ, բազմակողմանի եւ լրիվ հետազոտումն ապահովելու ուղղությամբ։