Տուլայում հայկական ավտոբուսի վթարի համար 4.5 տարվա ազատազրկման դատապարտված հայ վարորդ Գառնիկ Հարությունյանի պաշտպանները մտադիր են դիմել Մարդու իրավունքների եվրոպական դատարան: NEWS.am-ի հետ զրույցում Հարությունյանի պաշտպաններից Ռուբեն Կիրակոսյանը հայտնեց, որ Հարությունյանի սահմանադրական իրավունքը խախտված է:
«Գործի նյութերը ռուսերենից հայերեն նորմալ չեն թարգմանվել, կոպիտ սխալներով են թարգմանվել, իմ պաշտպանյալը մինչեւ այսօր չի հասկանում, թե ինչում են իրեն մեղավոր ճանաչում: Նույնիսկ մեղադրական եզրակացությունը նորմալ չեն թարգմանել Հարությունյանի համար »,- ասաց փաստաբանը:
Ռուբեն Կիրակոսյանը հայտնեց նաեւ, որ ռուսաստանյան դատարանը դիմել է, որպեսզի կարգապահական վարույթ հարուցեն Հարությունյանի փաստաբանների նկատմամբ, այս կերպ փորձելով ճնշում գործադրել. «Դա իրենց մոտ չի հաջողվի: Մենք երեք ատյաններում էլ պահանջել ենք, որ ուսումնասիրվի հարցը` արդյոք այդ ավտոբուսները համապատասխանում են նորմերին եւ կարող են շահագործվել, սակայն այս հարցն այդպես էլ քննարկման առարկա չդարձավ: Բացի դրանից, դատերից մեկի ժամանակ Գառնիկ Հարությունյանի առողջական վիճակը վատացել էր, սակայն դատարանը թույլ չտվեց «Շտապօգնություն» հրավիրել: Մենք այս ամենի մասին բարձրաձայնել ենք ու հենց դրանից հետո դատարանը դիմեց, որ կարգապահական վարույթ հարուցեն»:
Հիշեցնենք, որ վթարը Տուլայի մարզի Մ-4 մայրուղում տեղի է ունեցել 2015թ. նոյեմբերի 3-ին: Ավտոբուսում կար ավելի քան 60 մարդ, բոլորը Հայաստանի քաղաքացիներ: Վթարի հետեւանքով զոհվել է 9 մարդ, տուժել՝ 46-ը, որոնցից 32-ը հոսպիտալացվել է: Վարորդի դեմ քրեական գործ էր հարուցվել «ճանապարհային երթեւեկության կանոնները խախտելը, որն անզգուշաբար հանգեցրել է երկու եւ ավելի մարդկանց մահվան» հոդվածով: Դատարանը որպես խափանման միջոց ընտրել էր կալանավորումը:
