Օտտավայի Քարլթոնի համալսարանում փետրվարի 13-ին «Բելառուսը եւ նրա հարեւանները» խորագրով դասախոսությամբ է հանդես եկել Բելառուսի արտաքին գործերի նախարարի տեղակալ Օլեգ Կրավչենկոն, որին ներկա են գտնվել Օտտավայի հայ ուսանողների միության, ինչպես նաեւ Օտտավայի Հայ դատի գրասենյակի ներկայացուցիչները եւ մի լավ «նեղը գցել» Կրավչենկոյին:

Դասախոսության ավարտին տեղի է ունեցել հարցուպատասխան, որի ընթացքում հայ ուսանողների կողմից Բելառուսի փոխարտգործնախարարին է ուղղվել հարցերի տեղատարափ, որոնք բացառապես կապված էին Ռուսաստանի եւ Իսրայելի քաղաքացի, բլոգեր Ալեքսանդր Լապշինին` Բելառուսից Ադրբեջան արտահանձնելու, եւ առհասարակ, Բելառուսում մարդու իրավունքների խախտումների հետ, որոնց Օլեգ Կրավչենկոն շփոթված ու հակասական պատասխաններ է տվել:

Դասախոսության ընթացքում Օլեգ Կրավչենկոն զուգահեռներ է անցկացրել Կանադայի եւ Բելառուսի միջեւ, սակայն հնչած այն հարցին, որ Կանադան ժողովրդավարական երկիր է, իսկ Բելառուսի նախագահն արդեն ավելի քան 20 տարի է միահեծան կերպով կառավարում է երկիրը, Կրավչենկոն պատասխանել է, որ անթերի երկրներ չկան:

Անդրադառնալով Ալեքսանդր Լապշինի արտահանձնման հարցին` Բելառուսի փոխարտգործնախարարը բառացիորեն նշել է. «Երբեմն արտահանձման վերաբերյալ ԱՊՀ կոնվենցիաները կարող են հակասել ՄԱԿ-ի կոնվենցիաներին»:

Այս միտքն ամբողջապես մերկացնում է Բելառուսի իրական գործելաոճը, որը բավականին հեռու է ՄԱԿ-ի կոնվենցիաներից եւ միջազգային իրավական այլ ակտերից։