Ղարաբաղցի իրավապաշտպաններն այցելել են Լեռնային Ղարաբաղում կալանավորված Ադրբեջանի քաղաքացի Էլնուր Հուսեյնզադեին:
Լեռնային Ղարաբաղի «Հելսինկյան նախաձեռնություն-92» կոմիտեն դիտարկման արդյունքներով հայտարարություն է տարածել, որում մասնավորապես ասված է, որ Հուսեյնզադեին այցելած կոմիտեի համակարգող Կարեն Օհանջանյանը եւ գործադիր տնօրեն Սվետլանա Ջանգիրյանը ծանոթացել են ադրբեջանցի ռազմագերու պահման պայմաններին, հետաքրքրվել նրա առողջությամբ: Դիտարկման եւ Էլնուր Հուսեյնզադեի հետ երկարատեւ զրույցի արդյունքում նրանք արձանագրել են, որ ադրբեջանցի ռազմագերու պահման պայմանները համապատասխանում են միջազգային հումանիտար իրավունքին: Նշված է, որ նրա հոգեբանական վիճակը նորմալ է, եւ նա դրական է գնահատում իր նկատմամբ ղարաբաղյան իշխանությունների վերաբերմունքը: