«Ազատ դեմոկրատներ» կուսակցությունն ու «Ելք» դաշինքը քաղաքական գործունեության գրեթե նույն դաշտում են: Փետրվարի 17-ին կայացած մամուլի ասուլիսում այս մասին հայտարարեց «Ժառանգություն» կուսակցության նախկին անդամ Անահիտ Բախշյանը, որը «Ազատ դեմոկրատներ» կուսակցության համապետական ընտրացուցակի երրորդ հորիզոնականում է:
Նրա խոսքով՝ խորհրդարանական ընտրություններին մասնակցող բոլոր ուժերն իրենց մրցակիցներն են. «Ե՛վ իշխող ՀՀԿ-ն, ե՛ւ «Ծառուկյան» դաշինքը, ե՛ւ, իհարկե, «Ելք» դաշինքը: Բայց «Ելք»-ը մեզ հետ գրեթե նույն դաշտում է, եւ մենք պետք է հիմնավորենք, թե ինչ տարբերություններ ունենք: Իսկ դրա համար, կարծում եմ, մենք բավականաչափ գաղափարներ ունենք»:
Ըստ Բախշյանի՝ «Ազատ դեմոկրատների» ընտրացուցակը բավական երիտասարդ է: «101 թեկնածուների 60%-ը երիտասարդներ են, շուրջ 40%-ը՝ կանայք: Սա ցանկ է, որը մեր հասարակության շրջանում հույս կառաջացնի, որ բոլոր թարմ գաղափարները խորհրդարան կմտնեն»,- հավելեց Բախշյանը:
Հիշեցնենք, որ «Ազատ դեմոկրատների» համապետական ընտրացուցակը գլխավորում է կուսակցության ղեկավար Խաչատուր Քոքոբելյանը: Ցանկի երկրորդ հորիզոնականում «Ազատություն» կուսակցության ղեկավար Հրանտ Բագրատյանն է, երրորդ տեղում՝ «Ժառանգություն» կուսակցության նախկին անդամ Անահիտ Բախշյանը, չորրորդ տեղում՝ «Ժառանգության» նույնպես նախկին անդամ Ստեփան Սաֆարյանը: