Թաիլանդի Վաթ Թհամմակայ վանական համալիրի դարպասների մոտ ոստիկանները բախվել են բուդդայական վանականների հետ: Մեկ տուժած կա: Այս մասին գրում է ՌԻԱ Նովոստին՝ վկայակոչելով «Կհոմ Չատ Լըք» պարբերականը:
Վանականները երկուշաբթի առավոտյան փորձել են պատռել ոստիկանական շղթան, որը կազմվել է՝ վանքի տարածք հավատացյալների հոսքը կանխելու: Վանահայր Փհրա Թհամաչայոյի նկատմամբ հետախուզում է հայտարարված՝ կոռուպցիային նպաստելու եւ խարդախության ճանապարհով ստացված շուրջ 40 մլն դոլար նվիրաբերություն ընդունելու մեղադրանքով:
Առավոտյան իշխանությունները հայտարարել են, որ «հետախուզումը դյուրացնելու համար» կդադարեցնեն վանքի էլեկտրականության եւ ջրի մատակարարումը:
Անցյալ շաբաթ հազարավոր ոստիկանների էին ուղարկել՝ վանքի տարածքը խուզարկելու: 400 հեկտար տարածքի խուզարկությունը երկու օր է տեւել, սակայն հետախուզվող վանականին գտնել չի հաջողվել:
