Ռուս-վրացական անդրկովկասյան տրանսպորտային հաղորդակցությունների ապաշրջափակման մասին նախնական համաձայնագիրը կարող է ղարաբաղյան հակամարտության մեջ լավ օրինակ լինել: Այս մասին փետրվարի 20-ին հայտարարեց Գլոբալիզացիայի եւ տարածաշրջանային հետազոտությունների կենտրոնի ղեկավար Ստեփան Գրիգորյանը՝ ելույթ ունենալով «Ռուս-վրացական նոր համաձայնություններ. Հայաստանը Ռուսաստան տանող այլընտրանքային ճանապարհ կունենա՞» թեմայով քննարկման ժամանակ:
Նրա խոսքով՝ վրացական եւ ռուսական կողմերը համաձայնվել են քաղաքական հարցերը տնտեսականից անջատել: «Եթե, օրինակ, Լեռնային Ղարաբաղի հակամատության կողմերը համաձայնվեն տնտեսական փոխհարաբերությունները զարգացնել, ինչ-որ վստահություն կստեղծվի, հետո հնարավոր կլինի լուծել քաղաքական հարցերը: Ռուս-վրացական համաձայնությունների օրինակը այս դրական տարրերն է պարունակում»,- նշեց Ստեփան Գրիգորյանը:
Հիշեցնենք, որ օրերս Վրաստանն ու Ռուսաստանը նախնական համաձայնության են եկել անդրկովկասյան տրանսպորտային հաղորդակցությունների ապաշրջափակման շուրջ, որը ձեռք է բերվել ՌԴ ԱԳ փոխնախարար Գրիգորի Կարասինի եւ Վրաստանի վարչապետի Ռուսաստանի հետ կապերի հարցով հատուկ ներկայացուցիչ Զուրաբ Աբաշիձեի Պրահայում կայացած հանդիպման ժամանակ:
