Թուրքիայի նախագահ Աբդուլահ Գյուլը հայտարարել է, որ Թուրքիայի եւ Իսրայելի հարաբերություններում հետագա լարվածությունը ամբողջությամբ կախված է իսրայելական կառավարությունից:
«Երկու երկրների միջեւ ստեղծված ներկա իրավիճակը Թուրքիայի որոշումը կամ կամքը չէ: Իսրայելի կառավարությունը կանի անհրաժեշտ ամեն բան, եթե նա բարձր է գնահատում նշանակությունը, որը Թուրքիան նախկինում ուներ Իսրայելի նկատմամբ: Ես խոսում եմ անհրաժեշտ քայլերի մասին` ըստ օրենքի, ոչ թե զիջումների մասին»,- ասել է Գյուլը, հանդես գալով Լոնդոնում միջազգային հարաբերությունների արքայական համալսարանում, գրում է Anadolu-ն:
Անկարան Իսրայելից պահանջում է պաշտոնապես ներողություն խնդրել Գազայի հատված ուղեւորվող «ազատության նավատորմի» վրա թուրքերին սպանելու համար եւ փոխհատուցում վճարել զոհերի հարազատներին:
Ավելի վաղ NEWS.am-ը հայտնել էր, որ մայիսի 31-ին Իսրայելի զինված ուժերը ձերբակալել էին 6 նավեր, որոնք փորձում էին ճեղքել Գազայի հատվածի շրջափակումը: Նավերի անձնակազմերը դիմադրություն էին ցույց տվել, որի արդյունքում 9 թուրքեր զոհվել էին:
