Ազգային ժողովի ՀՀԿ խմբակցության պատգամավոր Լեռնիկ Ալեքսանյանը չի բացառում, որ առաջիկայում թեկնածուներն ընտրակաշառք կբաժանեն: Այսօր` փետրվարի 24-ին, լրագրողների հետ հանդիպմանը Լեռնիկ Ալեքսանյանը նաեւ ընդգծեց` այդպիսիք կլինեն նաեւ Հանրապետական կուսակցությունից:
«Մեր կուսակցությունն ու կուսակցության ղեկավարը բազմիցս նշել են, որ չեն խրախուսում ընտրակաշառքը, ավելին, ցանկանում են արդար եւ ազատ ընտրություններ անցկացնել Հայաստանում: Սակայն չեմ բացառում, որ կլինեն անհատներ եւ ՀՀԿ-ից, եւ մյուս կուսակցություններից, որոնք լավություն կանեն մարդկանց. կաշառք կբաժանեն»,- ասաց ՀՀԿ-ական պատգամավորը:
Լեռնիկ Ալեքսանյանի գնահատմամբ, դժվար է առանձնացնել բարեգործությունն ու կաշառքը: Նրա կարծիքով, կլինեն թեկնածուներ, որոնք կաշառք չեն բաժանի, բայց նախկինում կատարած բարեգործությունների համար մարդիկ նրանց ձայն կտան, օրինակ, բարեգործություն կարելի է համարել դպրոցի, մանկապարտեզի վերանորոգումը, փողոցների ասֆալտապատումը, երեխաների ուսման վարձը վճարելը:
«Այդպիսի մեծահարուստներ կան բոլոր կուսակցություններից»,- նշեց նա:
Մամուլի ասուլիսին ներկա «Կոնգրես- ՀԺԿ» դաշինքի 4-րդ համարը` Զոյա Թադեւոսյանը, հակադարձեց` իրենց դաշինքից ոչ ոք ընտրակաշառք չի բաժանել եւ չի բաժանելու:
Նշենք, որ մամուլում արդեն տեղեկություններ կան, որ թեկնածուները սկսել են ընտրակաշառք բաժանել: