Պաշտպանության նախարարի պաշտոնը քաղաքացիական պաշտոն է: Այս մասին, այսօր՝ փետրվարի 27-ին, Ազգային ժողովում լրագրողների հետ զրույցում հայտարարել է ԱԺ նախագահ Գալուստ Սահակյանը՝ անդրադառնալով դիտարկմանը, որ այս լարված շրջանում պաշտպանության նախարար Վիգեն Սարգսյանը ՀՀԿ ցուցակի առաջին համարն է եւ զբաղվում է քարոզչությամբ:
«Գիտեք, էդպես ասել` ով է առաջին համար, ով վերջին համարը… Վերջին հաշվով պետք է մտածեք հետեւյալի մասին, որ սա նոր ընտրական կարգ է եւ այստեղ խնդիրը չի վերաբերում ով է առաջինը, ով՝ վերջինը: Պարզապես նստել, քննարկել ենք, գտել ենք, որ առաջին համարը լինեն մարդիկ, որ հնարավորություն ունեն ըստ ամենայնի ներկայացնեն ՀՀԿ գործունեությունը: Ես չեմ կարծում, որ կխանգարի, որովհետեւ հիմնական գործը` պաշտպանության գործը, շտաբի ղեկավարի վրա է դրված, իսկ նա քաղաքացիական պաշտոն է, բնականաբար այդ ամեն ինչը տեսնում է, հետեւում է եւ փորձում է լուծումներ տալ: Իհարկե, շատ դժվար է, բայց նա առավոտից գիշեր աշխատանքի մեջ է»,-ասաց Գալուստ Սահակյանը:
Նա չհամաձայնեց, որ ընտրությունների ժամանակ բանակին հնարավոր է ուղղորդել: Ըստ ԱԺ նախագահի` այս ընտրապայքարի ընթացքում նման խնդիր չի կարող լուծվել, որովհետեւ ընտրական համակարգն այնպիսին է, որ իշխանությունները չեն կարող բանակին ուղղորդել, որ իրեն ընտրի:
Նշենք, որ առաջիկա խորհրդարանական ընտրություններում իշխող ՀՀԿ-ի համամասնական ցուցակը գլխավորում է պաշտպանության նախարար Վիգեն Սարգսյանը: Երկրի նախագահն ու վարչապետը ընդգրկված չեն ցուցակում:
