Մարտի 5-ին «Ելք» դաշինքը կներկայացնի իր նախընտրական ծրագիրը, որը կզուգորդվի դրամահավաքով: Այս մասին, այսօր՝ փետրվարի 28-ին, մամուլի ասուլիսի ժամանակ հայտարարել է «Քաղաքացիական պայմանագիր» կուսակցության վարչության անդամ, «Ելք» դաշինքի 3-րդ հորիզոնական զբաղեցնող, ԱԺ պատգամավոր Նիկոլ Փաշինյանը:
«Մենք կազմակերպելու ենք դրամահավաք-երեկո, որտեղ «Ելք» դաշինքը եւ նրա առաջադրած թեկնածուները գումարներ են ընդունելու քաղաքացիներից: Դրանով պետք է փորձենք ֆինանսավորել մեր նախընտրական քարոզարշավը»,- ընդգծեց Փաշինյանը:
Նրա խոսքով, «Ելքը» իր ծրագրով առաջարկելու է Հայաստանի զարգացման այնպիսի մոդել, որը ներառելու է «մենաշնորհներ չունեցող տնտեսություն, առանց կոռուպցիա, առանց քաղբանտարկյալների պետություն» գաղափարը: Փաշինյանն ասաց, որ «Ելք»-ի նախընտրական ծրագրում Մարտի 1-ի, Հոկտեմբերի 27-ի եւ ՊՊԾ գնդի գրավման դեպքերը խորությամբ հասկանալու վերաբերյալ կետ կա. «Մենք հավակնում ենք Հայաստանում ստանձնել իշխանությունը, բայց մեզ համար կարեւորագույն հաղթանակը լինելու է այն, երբ որ լինի ժողովրդի կամքի արտահայտում»: