Եթե իշխանությունները փորձում են ճնշումների միջոցով մարդկանցից ձայներ կորզել, նրանց խաբելու ձեւ կա։Այս մասին փետրվարի 28-ին ԱԺ-ում խորհրդարանական ելույթների ժամին հայտնել է «Լուսավոր Հայաստան» կուսակցության ղեկավար ու «Ելք» դաշինքում թիվ մեկ թեկնածու Էդմոն Մարուքյանը։
Եթե իշխանությունները տեղերում համոզում են մարդկանց, որ քվեախցիկը հսկվում է տեսախցիկներով, ապա նրանց հավատալ պետք չէ՝ ոչ քվեախցիկը, ոչ էլ դրա շուրջը տարածքը խցիկով չեն երեւում, կարելի է ազատ քվեարկել։
Կա մարդկանց վրա ճնշելու երկու միջոց, բայց երկուսն էլ կարելի է շրջանցել։ Այդ գիտելիքները կարող են օգտակար լինել բյուջետային աշխատողներին, որոնց վրա ճնշում գործադրելը իշխանությունների համար ավելի հեշտ է, հայտնել է Մարուքյանը։
Միջոց 1․ ինչպես հայտնի է, քվեարկողին 9 քվեաթերթիկ են տալիս։ Նա պետք է ծրարի մեջ դնի իր ընտրած այս կամ այն կուսակցությունով կամ դաշինքով թերթիկը։ Որ թերթիկը դրել է ծրարի մեջ, այդ կուսակցության կամ դաշինքի օգտին էլ քվեարկել է։ Մնացած քվեաթերթիկները պետք է զամբյուղը նետել։
«Ենթադրենք, ձեզնից պահանջում են քվեարկել ՀՀԿ-ի օգտին։ Իսկ դուք ծրարի մեջ մեկ այլ քվեաթերթիկ եք դրել։ Ելքի մոտ ձեզնից պահանջում են ցույց տալ, թե որ 8 քվեաթերթիկներն են մնացել, որ հասկանան, թե որն է եղել 9-րդը։ Այսինքն ձե րձեռքին չպետք է մնացած լինի ՀՀԿ-ով քվեաթերթիկը։
Պետք է այսպես անել՝ քվեարկեք ում օգտին ուզում եք։ ՀՀԿ-ով քվեաթերթիկը նետեք զամբյուղը։ Դրա փոխարեն հանեք մեկ ուրիշ ուժի քվեաթերթիկ՝ օրինակ «Ելք»-ինը, եթե նրա օգտին եք քվեարկել։ Այսպիսով քվեաթերթիկների թիվը կմնա առաջվա պես 8-ը, յուրաքանչյուրից մեկական։ Բայց դրանց մեջ ՀՀԿ-ն չի լինի»,- հայտնել է Մարուքյանը։
ՄԻջոց 2․ Վարկանշային (նախկին միամանդատ)թեկնածուներին ընտրում են սրանկյուն նշումով։ Տեղի ղեկավարությունը պահանջում է բջջային հեռախոսով լուսանկարել ՀՀԿ-ի քվեաթերթիկը՝ դիմացը նշումով, ու ցույց տալ իրենց։
Լուծում՝ դուք վերցնում եք ՀՀԿ-ի քվեաթերթիկը, դնում եք այնտեղ նշումը, լուսանկարում եք։ Հետո նետում եք այն զամբյուղի մեջ, իսկ հետո վերցնում եք ցանկացած այլ ուժի ցուցակով քվեաթերթիկը ու քվեարկում եք ում օգտին ուզում ես»,- ասել է Մարուքյանը։
