Հայաստանի խորհրդարանը մարտի 1–ին վավերացրել է Ասիական զարգացման բանկից վարկի համաձայնագիրը՝ դեպի Վրաստանի սահմանի մայրուղին վերանորոգելու համար։ Կողմ է քվեարկել 62, դեմ՝ 17, ձեռնպահ է մնացել 10 պատգամավոր, հաղորդում է NEWS.am–ը։
50 մլն դոլար վարկով կվերանորոգվի M6 մայրուղու հատվածը՝ 51,1 կմ (Վանաձոր–Վրաստանի սահման)։ Այդ ճանապարհը Հայաստանի եւ Վրաստանի միջեւ գլխավոր ճանապարհներից մեկն է։ Կվերանորոգվի ու կընդլայնվի Օձուն գյուղի հատվածը՝ մինչեւ սահմանամերձ Բագրատաշեն գյուղ։ Ճանապարհին կընդլայնվեն մի քանի թունելներ, ինչը մեծ բեռնատարներին թույլ կտա հանգիստ ընթանալ հանդիպակաց ճանապարհներով։
Մայրուղու ընդհանուր վերանորոգումը կարժենա 118,4 մլն դոլար, դրանից 50 մլն դոլարը՝ Ասիական զարգացման բանկից, 56,4 մլն–ը՝ Եվրոպական ներդրումային բանկից եւ 12 մլն–ը Հայաստանի կառավարության ֆինանսավորումն է։