Մի շարք քաղաքական գործիչներ եւ լրագրողներ դիմել են Իսրայելի վարչապետ Բենիամին Նեթանյահուին՝ խնդրելով աջակցել բլոգեր Ալեքսանդր Լապշինի ազատմանը:
Եվրոպայի հայկական ասոցիացիաների ֆորումից NEWS.am-ին հայտնեցին, որ նամակում նշված է.
«Ձերդ գերազանցություն, 2016 թվականի դեկտեմբերին Բելառուսում կալանավորել են Իսրայելի քաղաքացի Ալեքսանդր Լապշինին: Դա տեղի է ունեցել Ինտերպոլին Ադրբեջանի փոխանցած կալանքի օրդերի հիման վրա: Ադրբեջանի կողմից Լապշինի քրեական հետապնդումը սկսվել է, երբ նա այցելել է Լեռնային Ղարաբաղ եւ ռուսական ու արտասահմանյան լրատվամիջոցներում հրապարակած իր բլոգներում Ադրբեջանի հետ հակամարտությունում պաշտպանել է Լեռնային Ղարաբաղի դիրքորոշումը: Ալեքսանդր Լապշինի կալանքը զուտ քաղաքական բնույթ ունի, եւ Ինտերպոլի օրենսդրությամբ նա չպետք է պատասխանատվության ենթարկվի Ինտերպոլի միջոցով: Ալեքսանդր Լապշինը դատապարտվել է 8 տարի ժամկետով ազատազրկման եւ գտնվում է բանտում: Ի պատասխան լրատվամիջոցներում քննադատության՝ Ադրբեջանի իշխանություններն առաջարկել են Լապշինին ազատել, եթե նա իրեն մեղավոր ճանաչի եւ Ադրբեջանից ներողություն խնդրի:
Ես՝ ներքո ստորագրող Ֆրանտիշեկ Միկլոշկոն, 2010 թվականին նույնպես Ադրբեջանում քրեական պատասխանատվության եմ ենթարկվել Լեռնային Ղարաբաղի խորհրդարանական ընտրությունների դիտարկման միջազգային առաքելությանը մասնակցելու համար, եւ հնարավոր է՝ մեղադրանքները մինչ օրս պահպանվում են: Ինձ կալանավորելու օրդերը եւս տրամադրվել էր Ինտերպոլի կողմից: Բայց Սլովակիայի եւ Հայաստանի բողոքների հիման վրա Ինտերպոլն իմ անունը հանեց հետախուզվողների ցուցակից, քանի որ ընդունեց, որ ինձ առաջադրված մեղադրանքները կրում են զուտ քաղաքական բնույթ: Բարեբախտաբար, մինչ անունս Ինտերպոլի ցուցակում էր, ես չեմ այցելել այն երկիրրը, որը համանման հարցերում համագործակցում է Ադրբեջանի հետ:
Ձերդ գերազանցություն, մենք Ձեզ ենք դիմում, որպեսզի Իսրայելը նախաձեռնի Ալեքսանդր Լապշինին ազատելու համար հնարավոր բոլոր գործողությունները: Նրա այցը այց էր մարդկանց, որոնք հերոսաբար պաշտպանում են իրենց նախնիների հողերը, իսկ նրա բլոգները հարգանքի տուրք են այդ մարդկանց: Նրա կալանքը եւ դատապարտումը հակասում են Ազատությունների եւ Իրավունքների Մեծ Խարտիային: Որպես ՄԱԿ-ի անդամ՝ Ադրբեջանը նույնպես պարտավոր է հետեւել օրենսդրությանը: Ալեքսանդր Լապշինին ազատելը չի կարող հիմնվել իրեն մեղավոր ճանաչելու վրա հանցագործությունների համար, որոնք նա չի կատարել: Մենք մեր բարոյական պարտքն ենք համարում հանդես գալ հանուն Ալեքսանդր Լապշինի ազատման»:
Նամակը ստորագրել են Ֆրանտիշեկ Միկլոշկոն՝ 1990-2010 թվականներին Սլովակիայի խորհրդարանի պատգամավոր, 1990-1992 թվականներին Սլովակիայի խորհրդարանի նախագահ, Յան Չարնոգուրսկին՝ 1991-1992 թվականներին Սլովակիայի վարչապետ, Վլադիմիր Պալկոն՝ 2002-2006 թվականներին Սլովակիայի ներքին գործերի նախարար, Աշոտ Գրիգորյանը՝ Եվրոպայի հայկական ասոցիացիաների ֆորում, Ռադովան Պավլիկը՝ SITA գործակալության թղթակից:
Նշենք, որ նամակում առկա են մի շարք անճշտություններ: Այսպես՝ չնայած Ադրբեջանի հայտարարություններին, պարզվել է, որ Ալեքսանդր Լապշինը հետախուզվել է ոչ թե Ինտերպոլի մասով, այլ ԱՊՀ-ի: Նրա նկատմամբ նաեւ դեռեւս դատավճիռ չի կայացվել:
