Անհեթեթություն են խոսակցություններն այն մասին, թե Շիրակի մարզի Արթիկի տարածաշրջանը բռնի ՕԵԿ-ացվում է: Այս մասին հայտարարեց ՕԵԿ փոխնախագահ, ԱԺ ՕԵԿ խմբակցության ղեկավար Հեղինե Բիշարյանը՝ հերքելով ՀԱԿ-ի կազմում ընդգրկված «Ժողովրդավարական հայրենիք» կուսակցության նախագահ Պետրոս Մակեյանի այն պնդումը, թե Արթիկի տարածաշրջանը «քվոտայով» տրվել է ՕԵԿ-ին, եւ տեղի բնակչությունը բռնի կերպով անդամագրվում է այդ կուսակցությանը:
«Բոլորիդ է հայտնի, որ մեր կուսակցության նախագահի ծնողների արմատները, ե՜ւ իմ, ե՜ւ Հովհաննես Մարգարյանի ե՜ւ Արծրունի Աղաջանյանի արմատները Արթիկից են: Մեր հարազատներն ու բարեկամները մեծամասամբ ապրում են այդ տարածաշրջանում: Եւ բացի դրանից, ՕԵԿ-ը միշտ ակտիվ է եղել այդ տարածաշրջանում եւ ցուցանիշները միշտ բարձր են եղել: Եթե մենք այդտեղ կայուն ընտրազանգված եւ քաղաքական թիմեր ունենք, դա չի նշանակում, որ դա պետք է շահարկել»,-նկատեց Բիշարյանը:
Նշենք, որ Պետրոս Մակեյանը, ով ծնունդով Արթիկի տարածաշրջանի Փանիկ գյուղից է, մամուլում հայտարարել էր նաեւ, որ Արթիկի տարածաշրջանի ՕԵԿ-ացման գործընթացին հատկապես ջանասիրաբար լծված է Արթիկի նորանշանակ ոստիկանապետ Տիգան Պետրոսյանը: Նա, ըստ Մակեյանի, պարտադրում, ստիպում ու սպառնում է ՕԵԿ-ին անդամագրվելուց հրաժարվողներին, այսպիսով չարաշահելով իր պաշտոնեական դիրքը: NEWS.am-ի թղթակցի հետ զրույցում Պետրոս Մակեյանը պնդեց իր խոսքերը՝ հավելելով, թե բազմաթիվ փաստեր ունի ձեռքի տակ: «Արթիկի ամբողջ տարածքը, ըստ ստացված հրահանգի, պետք է ՕԵԿ-ացվի, ինչին պետք է միջամտի եւ աջակցի ոստիկանությունը: Ես ներկայացնում եմ տարածաշրջանում տիրող իրավիճակի միայն 50 տոկոսը, իսկ մնացածի մասին, եթե ամոթից զրկված ՕԵԿ ղեկավարները շարունակեն իրենց բարբաջանքները, ես կհրապարակեմ իմ ձեռքի տակ եղած փաստերը: Մի թիվ ասեմ՝ Արթիկի 23 գյուղից 18-ը «Օրինաց» են գրվել: ՕԵԿ-ը կուսակցություն չի, այլ աղանդ»,-հավաստիացրեց «Ժողովրդավարական հայրենիք» կուսակցության ղեկավարը: