Հայաստանում աշխատավարձերն ու կենսաթոշակները հարկավոր է ինդեքսավորել: Մարտի 15-ին լրագրողների հետ հանդիպման ժամանակ այս մասին հայտարարեց «Հայկական վերածնունդ» (վերակազմավորված «Օրինաց երկիր») կուսակցությունից պատգամավորության թեկնածու Վիլեն Խաչատրյանը:
Նրա խոսքով՝ միայն այդպես կարելի է հետեւել հայկական պետության սոցիալական բնույթի մասին սահմանադրական նորմին: Ինդեքսավորումն անհրաժեշտ է գնաճից ելնելով, որպեսզի եթե քաղաքացիների իրական եկամուտները չաճեն, գոնե չնվազեն:
«Բյուջեին դա 8-9 մլրդ դրամ կարժենա (շուրջ 18 մլն դոլար - խմբ.), եւ այդ գումարը գտնելը միանգամայն իրատեսական է: Օրինակ՝ ստվերային զբաղվածության կրճատման ուղղությամբ քայլերի արդյունքում աշխատավարձերից ավելի շատ եկամտահարկ կհավաքագրվի»,- նշեց Խաչատրյանը:
