Հայկական կողմը հիմա ավելի շատ առավելություններ ունի, քան Ադրբեջանը: Haqqin.az-ին տված հարցազրույցում այս մասին հայտարարել է ԵԱՀԿ Մինսկի խմբի ռուսաստանցի նախկին համանախագահ, ՌԴ արտաքին հետախուզական ծառայության ղեկավար Վյաչեսլավ Տրուբնիկովը:
Ռուսաստանի կողմից ճնշման հնարավորության մասին հարցին նախկին համանախագահը նշել է. «Ո՛չ մեկ, ո՛չ մյուս կողմի վրա որեւէ ճնշում արդյունք չի տա: Հայկական կողմն այսօր ավելի շատ առավելություն ունի, քան Ադրբեջանը. հայկական կողմի մոտ են գրավյալ տարածքները, նրա մոտ է Լեռնային Ղարաբաղը: Կարծում եք, որ նման առավելություններ ունենալով, նա հեշտությամբ կհամաձայնի՞ լուծել այդ խնդիրը: Հայաստանը բանակցային գործընթացում առավելագույնս կօգտագործի իր հաղթաթղթերը, իսկ ճնշման գործադրումը հակառակ արդյունքը կտա: Այդ պատճառով հարկավոր է համբերատար կերպով կողմերին համոզել խնդրի խաղաղ կարգավորման հարցում: Հակամարտության խաղաղ կարգավորմանն այլընտրանք չկա: Այստեղ միայն կողմերի քաղաքական կամքն է անհրաժեշտ:
Հարկավոր է առաջին հերթին վստահության մթնոլորտ ստեղծել: Եվ ոչ մի դեպքում թույլ չտալ պատերազմական հռետորաբանություն: Ցանկացած նման հայտարարություն մեզ միայն հեռացնում է խնդրի լուծումից: Իսկ «ո՛չ պատերազմ, ո՛չ խաղաղությունն» վիճակը վտանգավոր է»:
Խոսելով ռազմական գործողությունների վերսկսման հնարավորության մասին՝ Վյաչեսլավ Տրուբնիկովը նշել է, որ չէր սպասում, որ դա տեղի կունենա: «Բայց տեղի ունեցավ: Բայց դուք հարց տվե՞լ եք, թե ինչու քաշեցիք ձգանը: Խնդիրը ուժային ճանապարհով, նոր պատերազմով լուծելու ձգտումը ոչ մի արդյունք չի տա՝ իրավիճակի բարձրացումից եւ Ադրբեջանի կողմից նոր տարածքներ կորցնելու հավանականությունից զատ:
Ռուսաստանն իր կողմից հնարավոր ամեն ինչ կանի, որպեսզի ռազմական գործողությունները ոչ մի դեպքում չվերսկսվեն: Դա, ի վերջո, մեր ազգային անվտանգության խնդիրն է: Որպես ԵԱՀԿ Մինսկի խմբի համանախագահ՝ դրա կարգավորման տարբերակներ կփնտրենք»,- նշել է Տրուբնիկովը:
Միաժամանակ, նա բացասաբար է արձագանքել ղարաբաղյան հակամարտության գոտում խաղաղարարների տեղակայմանը: «Դա ի՞նչ կարող է տալ: Ծանր տեխնիկայի դուրս բերումն արդեն իրականացվում է: ԵԱՀԿ ՄԽ-ն տարեկան երկու անգամ հատում է զիվնած ուժերի շփման գիծը: Ընդ որում՝ ականապատ տարածքներով, որը գրավյալ տարածքներում տեղադրել են հայկական զինված ուժերը: Այդ պատճառով հակամարտության գոտում «երկնագույն սաղավարտների» տեղակայման իմաստ չեմ տեսնում:
Այլ հարց է, որ երկու կողմից էլ փախստականների խնդիր կա: Ադրբեջանցի փախստականներից բացի՝ նաեւ Բաքվի, Սումգայիթի հայերի խնդիրը կա, որոնք նույնպես արտաքսվել են իրենց տներից ադրբեջանական տարածքների բռնազավթումից շատ առաջ: Այդ պատճառով խնդիրը համալիր լուծում է պահանջում՝ առանց կողմերի շահերը ոտնահարելու:
Ադրբեջանցիներն ու հայերն իրենք պետք է որոշակի լուծման հանգեն, իսկ մենք պետք է միայն օգնենք: Վերջապես հասկացեք, որ դա Պուտինի, Թրամփի կամ Օլանդի խնդիրը չէ, դա ձեր ու հայերի խնդիրն է: Պետք չէ ձեր խնդիրները մեզ վրա բարդել. դուք համաձայնության եկեք, իսկ մենք միշտ ուրախ կլինենք օգնել: Ի վերջո՝ դա Ադրբեջանի ու Հայաստանի կայուն զարգացման, նրանց ժողովուրդների բարեկեցության հարցն է, այդ պատճառով կողմերը պետք է շահագրգռված լինեն խաղաղության հարցում»,- ընդգծել է Վյաչեսլավ Տրուբնիկովը:
