Մենք արյուն փոխելու, չինովնիկներին ժանգոտած վիճակից դուրս բերելու խնդիր ունենք: Այսօր՝ մարտի 18-ին Նոյեմբերյանում ընտրողների հետ հանդիպման ժամանակ այս մասին հայտարարեց ՀՀԿ փոխնախագահ, վարչապետ Կարեն Կարապետյանը՝ պատասխանելով ընտրողներից մեկի հարցին, թե ինչպե՞ս պետք է լուծվի աշխատատեղերի խնդիրը, հատկապես երիտասարդների համար:
«Երիտասարդների հետ իսկապես խնդիր ունենք, պետական համակարգում աշխատելու համար ասում են՝ պետք է փորձ ունենա, բայց մենք այսօր երիտասարդ, կրքոտ տղերքի խնդիր ունենք»,- ասաց վարչապետը:
Անդրադառնալով երիտասարդ ընտանիքներին տրվող բնակարանային հիփոթեքի պայմաններին՝ վարչապետը նշեց, որ այսօր ստեղծվում են հիմնադրամներ, որոնց միջոցով հնարավոր է լինելու շուկա բերել էժան փող, մուտքը, իհարկե, լինելու է սահմանափակ, բայց բանկային մրցակցությունը մեծանալու է: «Բանկերի կողմից իրենց տոկոսը թելադրելու կամ առաջարկելու հնարավորությունը պակասելու է»,- հայտարարեց Կարապետյանը:
Նոյեմբերյանցիները հետաքրքրվեցին նաեւ առողջապահական ոլորտով՝ մտահոգություն հայտնելով, որ բժշկական ծառայություններն այնքան թանկ են, որ բժշկի են դիմում միայն ծայրահեղ անհրաժեշտության դեպքում: Վարչապետը նշեց, որ բարեփոխումներ են արվել, որոնց շնորհիվ քաղաքացին պետպատվերի շրջանակում արդեն ինքն է ընտրելու՝ որտեղ բուժվել. «Մենք մտադիր ենք վերացնել պետպատվերի եւ շուկայական գների տարբերությունը, որ կոռուպցիոն ռիսկերը վերացնենք, այս կերպ կարող ենք ստվերը բերել դաշտ: Մենք ուզում ենք, որ առողջապահության նախարարությունը, բացի պետպատվերից, մնացած ծառայությունների ստվերը բերի դաշտ»:
Հիշեցնենք, որ ՀՀԿ-ի քարոզարշավը հիմնականում իրականացնում է վարչապետ Կարեն Կարապետյանը, որը իշխող կուսակցության համապետական ընտրացուցակում ընդգրկված չէ: Նա մարտի 18-ին նախընտրական հանդիպումներ է ունեցել Տավուշում: Վաղը սպասվում է նրա այցը Լոռու մարզ:
