Բելառուսից ճանապարհորդ, ֆրիլանսեր Ալեքսանդր Գոյշիկը ներողություն է խնդրել բլոգեր Ալեքսանդր Լապշինի գործով Բելառուսի ղեկավարության պահվածքի համար:
Ստեփանակերտում ընթացող բլոգերների միջազգային համաժողովին մասնակցող Ալեքսանդր Գոյշիկը նշել է, որ Ալեքսանդր Լապշինին Ադրբեջանի իշխանություններին հանձնելով Բելառուսի իշխանությունները փորձել են Ադրբեջանից արտոնություն ստանալ: «Ես ինքս ճանապարհորդ եմ եւ գիտեմ, թե որքան վատ է «մեծ խաղում» զինվորի խաղաքար դառնալը»,- նշել է բլոգերը: Նրա գնահատմամբ՝ Բելառուսի իշխանությունների գործողությունները վատ են անդրադարձել երկրի իմիջի վրա, իսկ Բելառուսը չստացավ խոստացված նավթը: «Բելառուսները միանշանակ դեմ էին իշխանությունների նման որոշմանը»,- նշել է Ալեքսանդր Գոյշիկը՝ ներողություն խնդրելով:
Բելառուս բլոգերը Լեռնային Ղարաբաղում է արդեն երրորդ անգամ՝ նա այնտեղ առաջին անգամ այցելել է 10 տարի առաջ, այնհետեւ մեկ տարի առաջ՝ լարվածության ժամանակ: Բլոգերը ղարաբաղցիներին խաղաղություն եւ բարգավաճում է ցանկացել: «Բելառուսում մենք, ինչպես ոչ ոք, լավ գիտենք, թե ինչ է սարսափելի պատերազմը: Որ խաղաղություն լինի, ճանապարհորդները կարողանան հանգիստ այցելել»,- ցանկացել է Ալեքսանդր Գոյշիկը:
Ավելի վաղ NEWS.am-ը հայտնել էր, որ Ռուսաստանի եւ Իսրայելի քաղաքացի Ալեքսանդր Լապշինը ձերբակալվել է 2016-ի դեկտեմբերին Մինսկում՝ Ադրբեջանի պահանջով, որտեղ նա ներառված է «սեւ ցուցակում» ԼՂՀ այցելության համար։
Նման անձանց մուտքն Ադրբեջան արգելվում է, Լապշինը, սակայն, 2015-ին Վրաստանի տարածքով եւ Ուկրաինայի քաղաքացու անձնագրով մտել էր Ադրբեջան այն բանի շնորհիվ, որ նրա անվան գրության մեջ տառի տարբերություն կա։ Ուկրաինական անձնագրում գրված է «Օլեկսանդր»։ Դրանից հետո Ադրբեջանը բլոգերի նկատմամբ հետախուզում էր հայտարարել՝ «Պետական սահմանի մասին» օրենքը խախտելու համար:
Հունվարի 17–ին Բելառուսի դատախազությունը որոշել էր բավարարել Ադրբեջանի պահանջը եւ արտահանձնել Լապշինին Ադրբեջանին։ Իսկ հունվարի 26–ին Մինսկի դատարանը մերժել էր Լապշինի փաստաբանների բողոքը:
Ռուսաստանը եւ Իսրայելը փորձել են հասնել արտահանձնման որոշման չեղարկմանը: Սակայն Բելառուսի նախագահ Ալեքսանդր Լուկաշենկոյի վերջերս կայացած մամուլի ասուլիսից հետո ակնհայտ էր, որ Լապշինին կարտահանձնեն:
Փետրվարի 7-ի երեկոյան Ալեքսանդր Լապշինին Բաքու են տեղափոխել: