Ղարաբաղյան հակամարտության կարգավորման սկզբունքները որոշել ենք ոչ թե մենք, կամ Ղարաբաղը, կամ Ադրբեջանը, այլ միջազգային կառույցները: Այդ մասին Հանրային հեռուստատեսության «Օրակարգից դուրս» հաղորդման ընթացքում ասել է Հայաստանի առաջին նախագահ Լեւոն Տեր-Պետրոսյանը:
Նրա խոսքով, խնդիրը մեր եւ Ադրբեջանի միջեւ չէ, խնդիրն աշխարհաքաղաքական է: «Թե Հայաստանը, թե Ադրբեջանը միջազգային ամենահեղինակավոր կառույցների անդամներ են՝ ՄԱԿ-ի եւ ԵԱՀԿ-ի: Հակամարտության կարգավորման սկզբունքները որոշել ենք ոչ թե մենք, կամ Ղարաբաղը, կամ Ադրբեջանը, այլ միջազգային կառույցները»,- ասել է Տեր-Պետրոսյանն ու հավելել. «Ղարաբաղյան կարգավորման գործընթացը վերացական մի հարթակ չէ, այլ կոնկրետ լիազորություններով օժտված մի ատյան, որին վստահված է տնօրինել այս հարցը: Դա ԵԱՀԿ Մինսկի խումբն է, որը ստացել է նաեւ ՄԱԿ-ի օրհնությունը»:
Ըստ առաջին նախագահի, բոլոր առաջարկները, որ եղել են, եղել են միջազգային այդ կառույցների առաջարկները՝ մեզ եւ Ադրբեջանին: «Հարցը կոնկրետ է դրված, մի կարգավորման պլան՝ Մադրիդյան սկզբունքների հիման վրա, որի շուրջ Հայաստանի իշխանություններն ու Ադրբեջանը բանակցում են արդեն 10 տարի»,- նշել է Տեր-Պետրոսյանը՝ հավելելով, որ մինչեւ հիմա եղել է վեց պլան, որոնք, ըստ էության, իրարից տարբերվում են մեթոդաբանությամբ: Փաթեթայինները մերժվել են, Մադրիդյան սկզբունքները դեռեւս ընթացքի մեջ են, իսկ Ադրբեջանն ու Հայաստանը սկզբունքային համաձայնություն են տվել, բանակցում են: Սկզբունքների վերաբերյալ որեւէ մեկը վիճաբանություն չունի: «Իսկ սկզբունքները հետեւյալն են՝ տարածքների վերադարձ, ուժի կամ ուժի սպառնալիքի չկիրառում եւ Ղարաբաղի ինքնորոշման իրավունքի սահմանում: Բանակցությունները նրա համար են, որ կողմերը որքան հնարավոր է շահեկան դարձնեն լուծումն իրենց համար: Բայց սկզբում տարաձայնությունները հսկայական էին, այսօր հասել է մեկ-երկու հարցի»,- նշել է Տեր-Պետրոսյանը:
Հարցին, պատրա՞ստ է արդյոք Ադրբեջանը խնդրի կարգավորմանը, ՀՀ առաջին նախագահը պատասխանել է. «Եթե Ադրբեջանը պատրաստ չլիներ փոխզիջումների, չէր մասնակցի Մինսկի խմբի աշխատանքներին: Դա որոշում է միջազգային ատյանը: Ադրբեջանը չի սահմանելու Ղարաբաղի կարգավիճակը, կարգավիճակը սահմանելու է Մինսկի խումբը, վերջ»: