Հայաստանի սահմանամերձ 25 գյուղերի բնակիչներին նորից մեկ տարի կօգնեն վճարել գազի եւ էլեկտրականության համար: Համապաստախան որոշումն ընդունվել է ՀՀ կառավարության մարտի 23-ի նիստում:
Տարածքային կառավարման եւ զարգացման փոխնախարար Վաչե Տերտերյանը նշել է, որ օգնություն կստանան կառավարության նախորդ որոշումներից մեկում թվարկված գյուղերը: Ցանկում ներառված են 2-ական գյուղեր Արարատի, Գեղարքունիքի եւ Վայոց ձորի եւ 19 գյուղ՝ Տավուշի մարզից:
Դրանց բնակիչները գազի, էլեկտրականության եւ ոռոգման ջրի ծախսերի մասնակի փոխհատուցում կստանան, ինչպես նաեւ հակառակորդի կրակահերթերի թիրախում գտնվող հողի եւ գույքի հարկի ամբողջական փոխհատուցում:
2017 թվականին այդ նպատակների համար 929 մլն դրամ (1.9 մլն դոլար) է հատկացվելու:
