Ադրբեջանի արդարադատության նախարարությունը «պարզաբանել» է Ալեքսանդր Լապշինի ինքնազգացողության վատթարացման պատճառները:
haqqin.az-ը հայտնում է, որ արդարադատության նախարարության գլխավոր բժշկական վարչության հայտարարության մեջ նշված է, որ Ալեքսանդր Լապշինի, ինչպես նաեւ մյուս կալանավորների առողջական վիճակը մեկուսարան ընդունվելու պահից եղել է բժիշկների վերահսկողության տակ: Բժիշկների կողմից Ալեքսանդր Լապշինի բազմաթիվ զննումների արդյունքում նրա առողջական վիճակում պաթոլոգիաներ չեն հայտնաբերվել:
Հիշեցնենք, որ նախօրեին բլոգեր Ալեքսանդր Լապշինի կինը՝ Եկատերինան, հայտնել է ամուսնու առողջական վիճակի վատթարացման մասին:
«Նրա հիվանդության փաստը ստուգելու համար մարտի 22-ին նրան կրկին զննել են թերապեւտը եւ ԼՈՌ բժիշկը, որի արդյունքում բուժում պահանջող ոչ մի պաթոլոգիա չի հայտնաբերվել»,- նշված է հայտարարության մեջ: ԱՆ բժշկական գլխավոր վարչությունից նշել են, որ Լապշինի առողջական վիճակը ներկայումս բավարար է գնահատվում:
«Ինչ վերաբերում է կալանավորվածի առողջական վիճակի վերաբերյալ նրա ընտանիքի անդամների անհանգստությանը, ապա դա կապված է որոշակի ժամկետի հետ, որը պետք է անցնի ազատազրկմանը ընտելանալու համար»,- նշված է հայտարարության մեջ:
