ԿԸՀ-ն մարտի 23-ի արտահերթ նիստի ժամանակ որոշում է կայացրել ապրիլի 2-ի խորհրդարանական ընտրությունների ժամանակ էլեկտրոնային քվեարկության մեկնարկի ժամկետը սահմանելու մասին։
ԿԸՀ նախագահ Տիգրան Մուկուչյանը հայտնել է, որ էլեկտրոնային քվեարկությունը կսկսվի մարտի 24-ին, երևանյան ժամանակով 08։00-ին ու կավարտվի մարտի 26-ին՝ երևանյան ժամանակով 20։00-ին։ «Էլեկտրոնային մեթոդով քվեարկությանը մասնակցելու է 877 ընտրող։ Ընտրական քվեաթերթիկի էլեկտրոնային տարբերակը տեղակայվելու է ԿԸՀ կայքում։ Էլեկտրոնային քվեարկության արդյունքները ամփոփվելու են Հայաստանում քվեարկության ավարտից անմիջապես հետո»,- նշել է Մուկուչյանը։
Հիշեցնենք, որ էլեկտրոնային քվեարկությունը նախատեսված է այն ընտրողների համար, որոնք դիվանագիտական ծառայություն են անցնում Հայաստանի դիվանագիտական ու հյուպատոսական ներկայացուցչություններում ու նրանց ընտանիքի այն անդամների համար, որոնք քվեարկության իրավունք ունեն, նաև զինծառայողների, արտերկրներում երկարաժամկետ ուսման կամ գործուղման մեջ գտնվողների համար։