ԱՄՆ-ում ՀՀ դեսպան Գրիգոր Հովհաննիսյանը մարտի 22-ին, Կոնգրեսում հանդիպումներ է ունեցել հանրապետական կոնգրեսականներ, Կոնգրեսի Հայկական հարցերով հանձնախմբի համանախագահներ Դեւիդ Վալադաոյի եւ Դեւիդ Թրոթի, ինչպես նաեւ հանձնախմբի անդամ Դուգլաս Լամբըրնի հետ:
ԱԳՆ-ից NEWS.am-ում հայտնում են, որ դեսպանը շնորհակալություն է հայտնել կոնգրեսականներին` Հայաստանին վերաբերող հարցերը մշտապես ուշադրության կենտրոնում պահելու ու հայկական շահերը Կոնգրեսում պաշտպանելու համար:
Զրուցակիցները մտքեր փոխանակեցին հայ-ամերիկյան հարաբերությունների օրակարգային հարցերի վերաբերյալ, քննարկեցին տարածաշրջանային մի շարք խնդիրներ, այդ թվում, Մերձավոր Արեւելքում քրիստոնյա փոքրամասնությունների պաշտպանության եւ Հայաստանի կողմից բազմաթիվ փախստականներ ընդունելու հարցերը:
Դեսպանը եւ ԱՄՆ կոնգրեսականներն անդրադարձել են նաեւ Հայոց ցեղասպանության, ինչպես նաեւ այլ ցեղասպանությունների ճանաչման եւ դատապարտման գործընթացին:
Կոնգրեսականները հավաստիացրել են, որ հայ-ամերիկյան հարաբերությունների ամրապնդմանն ուղղված իրենց ջանքերը շարունակական կլինեն: