Ապրիլի 2-ին մենք ռեալ հնարավորություն ունենք իշխանափոխություն իրականացնելու Հայաստանում օրինական ճանապարհով, իսկ Հանրապետականն էլ լավ ընդդիմություն կարող է դառնալ: Այս մասին այսօր՝ մարտի 24-ին, Լոռու մարզի Ալավերդի քաղաքում ընտրողների հետ հանդիպմանն ասել է «Օհանյան-Րաֆֆի-Օսկանյան» դաշինքի անդամ, արտաքին գործերի նախկին նախարար Վարդան Օսկանյանը:
«Իշխանությունները լավ գիտակցում են, որ իրենք ոչ հեղինակություն ունեն, ոչ ժողովրդական աջակցություն; Իշխանությունները դրա մասին իմացել են 2013թ. նախագահական ընտրությունների ընթացքում, երբ Րաֆֆի Հովհաննիսյանը ակնհայտորեն իսկապես ժողովրդի լայն աջակցությունը ստացավ: Այդ օրվանից սկսեցին մտածել, թե հաջորդ ընտրություններին ոնց պետք է այս իրավիճակից դուրս գալ եւ ապահովել իրենց շարունակականությունը։ Ես կարծում եմ, որ դրանից հետո որոշում կայացրին սահմանադրությունը փոխել երկրում; Եկեք աշխատենք եւ նրանց ուղարկենք ընդդիմություն, նրանք լավ ընդդիմություն կլինեն»,- ասել է Վարդան Օսկանյանը:
Ըստ դաշինքի անդամի՝ հասարակությունն այսօր իսկապես ունի լավ ալընտրանք, ի դեմս իրենց, որովհետեւ համախմբվել են նախկին երկու արտգործնախարար, պաշտպանության նախարար:
Նշենք, որ «Օհանյան-Րաֆֆի-Օսկանյան» դաշինքն այսօր քարոզարշավ է իրականացնում Լոռիում: