Հայաստանի Հանրապետական կուսակցության դեմ ոչ մի քաղաքական ուժ չի պայքարում։ Այս մասին մարտի 24-ին լրագրողների հետ հանդիպման ժամանակ հայտարարել է Կովկասի ինստիտուտի տնօրեն, քաղաքագետ Ալեքսանդր Իսկանդարյանը:
Նա նշել է, որ նախընտրական պայքարը բավականին աշխույժ է անցնում։ «Պայքարն ընթանում է հիմնականում, այսպես կոչված ընդդիմադիր դաշտում։ Նախ, պայքար է ընթանում այն բանի համար, թե ով կանցնի խորհրդարան, քանի որ խորհրդարանում տեղերը քիչ են՝ բոլոր 9 ուժերը չեն կարողանա այնտեղ հայտնվել։ Երկրորդ, պայքար է ընթանում այն բանի համար, թե ով կլինի գլխավոր ու իսկական ընդդիմադիր», - ընդգծել է Իսկանդարյանը։
Քաղաքագետը նկատել է, որ այդ քաղաքական ուժերից ոչ մեկը նույնիսկ չի էլ հավակնում ձայների 54 տոկոս հավաքելուն։ «Մարդիկ, ովքեր կքվեարկեն հանրապետականների օգտին, ամաչում են դա խոստովանել ու չեն ասում սոցիոլոգներին։ Սակայն չկա այնպիսի ուժ, որը հավակնում է մեծամասնությունը վերցնելուն եւ հանրապետականների տեղը կանգնելուն։ Դրա արդյունքը ապատիան է, իսկ իշխանությունները փորձում են իրականացնել ապատիայի մենեջմենթը, եւ ինձ թվում է, որ այդ մենեջմենթը բավականին հաջողված կարող է լինել», - նշել է Իսկանդարյանը։