1994 թվականի ղարաբաղյան պատերազմը մենք հաղթեցինք շնորհիվ Լեւոն Տեր-Պետրոսյանի: Այս մասին այսօր` մարտի 24-ին, Մալաթիա-Սեբաստիա վարչական շրջանում, նախընտրական քարոզարշավի ժամանակ հայտարարել է «Կոնգրես-ՀԺԿ» դաշինքի ցուցակի երրորդ հորիզոնականը զբաղեցնող Լեւոն Զուրաբյանը:
Նրա խոսքով` առանց գլխավոր հրամանատարի վարած ճիշտ դիվանագիտական աշխատանքի եւ պատերազմի ընթացքի ճիշտ կազմակերպման հաղթանակի հասնել չէր ստացվի:
«Երբ մենք 1994 թվականին հաղթեցինք ղարաբաղյան պատերազմը, հաղթեցինք նախ գլխավոր հրամանատարի` Լեւոն Տեր-Պետրոսյանի շնորհիվ, որովհետեւ ժողովուրդը, զինվորները, հրամանատարները կարող են հերոս լինել, սակայն հաղթանակը անհնար կլինի, եթե ճիշտ չի կազմակերպվում պատերազմի վարումը, դիվանագիտական ճիշտ աշխատանքը եւ տնտեսական աջակցությունը պատերազմական գործողություններին: Տեր-Պետրոսյանը ընդամենը ցանկանում էր այդ հաղթանակին տեր կանգնել, հաղթանակը դարձնել անշրջելի»,-ասաց ԱԺ ՀԱԿ խմբակցության ղեկավարը:
Լեւոն Զուրաբյանի խոսքով` զինադադարը չի կարող խաղաղության երաշխիք դառնալ. «Զինադադարը դա ընդամենը ժամանակավոր պայմանավորվածություն է կողմերի միջեւ, որը հիմնված է կողմերի կամքի վրա եւ դա անշրջելի չի: Մինչեւ այդ զինադադարը, այդ ձեռք բերված հաղթանակը, ազատագրված Ղարաբաղի կարգավիճակը չֆիքսվի խաղաղության պայմանագրով, ապա հաղթանակը շրջելի է»:
