«ՕՐՕ» դաշինքը դիմելու է Կենտրոնական ընտրական հանձնաժողով՝ չեղյալ ճանաչելու համար ՀՀԿ մասնակցությունը ապրիլի 2 -ի խորհրդարանական ընտրություններին: Այդ մասին «Օհանյան-Րաֆֆի-Օսկանյան» դաշինքի անունից պաշտոնապես հայտարարեց պատգամավորության թեկնածու Արմեն Մարտիրոսյանը Սպիտակ քաղաքում:
Նրա խոսքով՝ առկա են բազմաթիվ ձայնագրություններ, որոնք ապացուցում են, որ ՀՀԿ-ն, չարաշահելով իր վարչական ռեսուրսը՝ դպրոցների ու մանկապարտեզների տնօրեններին հարկադրել է ընտրողների ցուցակներ կազմել։
«Մեծ ցավ է, որ մանկավարժներին այս իշխանությունները կեղտոտ խաղերի մեջ են մտցնում: Գիտեմ, որ իրենք էլ դա չեն ուզում, բայց մտցնում են կեղտոտ ընտրակեղծարարության մեջ»,- ասաց Արմեն Մարտիրոսյանը՝ նշելով, որ միայն այս փաստն արդեն բավարար է, որ ՀՀԿ-ի մասնակցությունը ապօրինի ճանաչվի:
Արմեն Մարտիրոսյանը հավաստիացրեց, որ առկա է 100-ից ավելի դպրոցների ձայնագրություններ, որոնք վկայում են ՀՀԿ-ի կողմից վարչական ռեսուրսի չարաշահման մասին. « Եվ, սա համատարած վիճակ է, որը վերաբերում է ոչ միայն դպրոցներին, այլեւ բոլոր պետական հիմնարկներին: Սա լուրջ խախտում է: Մենք այդ դիմումը ներկայացնելու ենք Կենտրոնական ընտրական հանձնաժողով: Կոչ ենք անում բոլոր ընդդիմադիր գործընկերներին, քննարկենք, ներկայացնենք միասնական դիմում, եթե ոչ՝ գոնե առանձին ներկայացնեն»:
Նշենք, որ Sut.am կայքը հրապարակել է հանրապետության բոլոր մարզերը եւ Երեւանի բոլոր տարածքները ընդգրկող թվով 84 դպրոցի եւ 30 մանկապարտեզի տնօրենների հետ զրույցների մանրամասները, թե ինչպես են ցուցակներ հավաքագրում ՀՀԿ-ի համար: