Այսօր դպրոցների տնօրենները Հայաստանի Հանրապետական կուսակցության կարեւոր հենարասյունն են եւ ընտրությունների կեղծման մեխանիզմի կարեւոր մասը: NEWS.am-ի հետ զրույցում նման տեսակետ հայտնեց ընտրական երկրորդ տարածքում «Ելք» դաշինքից պատգամավորի թեկնածու Հայկ Կոնջորյանը:
«Հենց այս պատճառով ՀՀԿ-ի շտաբն ամեն ինչ անում է, որ տեղի ունեցածը թաքցնի»,- ասաց նա՝ մեկնաբանելով երեկ համացանցում հայտնված դպրոցների եւ մանկապարտեզների տնօրենների ձայնագրությունները, որոնք զբաղվել են իշխանության օգտին ձայներ հավաքելով:
Նրա խոսքով՝ այս երեւույթի հետ կապված 2 հիմնական խնդիր կա՝ իրավական եւ բարոյաէթիկական: Իրավական պետության տեսակետից տեղի ունեցածը անհրաժեշտ է հետաքննել, եւ այս գործին առնչված բոլորը պետք է օրենքի առաջ պատասխան տան: «Եթե առկա փաստերով դատենք, խոսքը ծառայողական դիրքի չարաշահման մասին է: ՀՀԿ-ի շտաբը շտապեց հայտարարություն տարածել, որ դպրոցների տնօրեններին պաշտպանի: Չէ՞ որ նրանք Հանրապետական կուսակցության հենարասյունն են եւ ընտրությունների կեղծման մեխանիզմի կարեւոր մասը»,- ասաց Հայկ Կոնջորյանը:
Նրա կարծիքով, սակայն, տեղի ունեցածը հերքելը եւ պնդելը, թե ոչ մի չարաշահում չի եղել, սխալ է եւ անարդարացի: Նա հույս հայտնեց, որ հասարակությունը եւ քաղաքական ուժերը մինչեւ վերջ կգնան, եւ այս հարցը կլուծվի:
Ինչ վերաբերում է բարոյաէթիկական տեսանկյանը, ապա, «Ելքի» ներկայացուցչի խոսքով, շատերն են այս տնօրեններին եւ մանկավարժներին դատապարտում, քանի որ նրանք հիմնական աշխատանքը թողած՝ զբաղվել են իշխանության համար ձայներ հավաքելով: «Կարեւոր չէ, թե իրենք տնօրեններն ինչ կասեն, կարեւոր է, որ հասարակությունը ամեն ինչ հասկանում է եւ նրանց դատապարտում: Ես կարծում եմ, որ այս ամենը կարող է կարեւոր մեխանիզմ դառնալ քաղաքական մաղձը մաքրելու համար, որը գոյություն ունի եւ Հայաստանին խանգարում է ժողովրդավարական պետություն դառնալ»,- ասաց նա: