Երեւանում` Անտոն Չեխովի անվան դպրոցում, մարտի 25-ին ՀՀ Կենտրոնական ընտրական հանձնաժողովի նախաձեռնությամբ տեխնիկական սարքավորումների թեստ ցուցադրություն է տեղի ունեցել, որոնք ապրիլի 2-ին կայանալիք Հայաստանի խորհրդարանական ընտրություններում կիրականացնեն ընտրողների գրանցումը:
Ներկայացնելով ընտրողների գրանցման գործընթացը` «Էլեկտրոնային կառավարման ենթակառույցների ներդրման գրասենյակ» («Ekeng») ՓԲԸ-ի տնօրեն Արթուր Թունյանը նշել է. «Քաղաքացին մոտենում է օպերատոր մասնագետին, ներկայացնում փաստաթութղը: Դա կարող է լինել սովորական անձնագիր, կենսաչափական անձնագիր կա նույնականացման քարտ: Առաջին գործողությունը, որ պետք է անի օպերատորը` տեսողությամբ քաղաքացու անձը ստուգելն է: Հետո նա փաստաթուղթը ներբեռնում է MRZ դաշտը: Համակարգն առանձնացնում է քաղաքացու տվյալները, կանաչ լույս է վառվում, որից հետո առաջարկվում է ներբեռնել մատնահետքը»: Դրանից հետո, շարունակել է նա, հատուկ կտրոն է տպվում, որը տրվում է ընտրողին, եւ նա կարող է շարունակել գործընթացը` մոտենալով գրանցման մատյանին փաստաթղթով եւ իրեն տրամադրված կտրոնով:
«Կրկնակի գրանցման փորձի դեպքում հատուկ ձայնային ազդանշան է միանում, եւ այդ փաստը գրանցվում է: Հատուկ կտրոն է տպվում: Այդ դեպքում փաստաթուղթն ու կտրոնը չեն վերադարձվում քաղաքացուն: Ըստ էության, դա առաջին փաստաթուղթն է շրջանառության մեջ դնելու համար` դրա համար այն փոխանցվում է ոստիկանին», - նշել է Արթուր Թունյանը:
Նրա խոսքով` ընտրողին չի թույլատրվում քվեարկել անձնագրի պատճենի միջոցով, քանի որ դա փաստաթուղթ չի համարվում: «Անձնագրում կամ նույնականացման քարտում գոյություն ունի MRZ դաշտը: Եթե այդ տվյալները նշված կլինեն սովորական թղթի վրա, այդ դաշտը կարդացող ցանկացած սարքավորում, միշտ կճանաչի այդ տվյալները: Եթե մարդը գալիս եւ հարցնում է` արդյոք կարելի է պատճենով գրանցվել, օպերատորը նրան ասում է` ոչ, չի կարելի», - ընդգծել է Թունյանը:
«Իրազեկ քաղաքացիների միություն» հասարակական կազմակերպության ղեկավար Դանիել Իոաննիսյանն իր հերթին նշել է, որ այդ սարքավորման իմաստը մարդկային գործոնը բացառելն է: Նա հարց է տվել. «Եթե հազարավոր մասնագետներից որեւէ մեկը, ոչ ոք դա չի կարող բացառել, անբարեխիղճ լինի եւ թույլ տա անձնագրի պատճենով քվեարկել, դա կստացվի՞, թե՞ ոչ»:
Ի պատասխան` Հայաստանի Կենտրոնական ընտրական հանձնաժողովի նախագահ Տիգրան Մուկուչյանն ընդգծել է. «Այն, ինչի մասին դուք խոսում եք, քրեական հանցանք է: Բայց այսօր, նաեւ հաշվի առնելով տեղամասային կենտրոններում հասարակական վերահսկողության լայն հնարավորությունները, նման հանցագործություն ուղղակի չի կարող լինել»:
Արթուր Թունյանը նաեւ ներկայացրել է գրանցման սարքավորումների միջոցով ընտրատեղամասի փակումը:
«Տեղամասային ընտրական հանձնաժողովի նախագահի թույլտվությամբ համակարգը կտրոն-ուղեգիր է տպում, որը տեղեկություն է պարունակում սարքավորման միջոցով գրանցվածների ընդհանուր թվի մասին, ուղեգրի տպման տեղն ու ժամը եւ ընտրական տեղամասի նախագահի ստորագրություն եւ կնիքը: Դրանից հետո գործընթացը փակվում է, եւ այլեւս հնարավոր չէ քվերակել այդ համակարգով»,- հավելել է Թունյանը:
