Հարցումների մեր ունեցած տվյալներով՝ «Ծառուկյան» դաշինքը առաջին տեղում է, մենք նույնպես ծանրակշիռ ցուցանիշներ ունենք, եւ ես այս համատեքստում համագործակցության հեռանկարներ եմ տեսնում: Մարտի 27-ին՝ լրագրողների հետ հանդիպման ժամանակ այս մասին ասաց «Օհանյան-Րաֆֆի-Օսկանյան» դաշինքի առաջնորդներից մեկը՝ «Համախմբում» կուսակցության նախագահ Վարդան Օսկանյանը:
Անդրադառնալով «Ծառուկյան» դաշինքի հետ համագործակցության հավանականությանը՝ նա նշեց. «Մենք պատրաստ ենք ժողովրդի կողքին կանգնելու: Չեմ ուզում մյուս քաղաքական ուժերին նշել: Չեմ ուզում ասել, որ մենք պատրաստ ենք այս կամ այն քաղաքական ուժի հետ համագործակցել: Յուրաքանչյուրն ինքը թող որոշի՝ կկանգնի ժողովրդի կողքին, թե ոչ: Սակայն հետընտրական գործընթացներում ես համագործակցության իրատեսական, հստակ հնարավորություններ եմ տեսնում՝ հատկապես ելնելով այն թվերից, որոնք մեր տրամադրության տակ են»:
Միեւնույն ժամանակ, Վարդան Օսկանյանը հրաժարվեց պատասխանել հարցին, թե իրենց տրմադրության տակ եղած հարցման արդյունքներով ո՞ր ուժն է երկրորդ տեղում:
