Ակնհայտ է, որ անցյալ տարին անչափ վտանգավոր էր ղարաբաղյան խնդրի կարգավորման համար, եւ բացառված չէ, որ ընթացիկ տարին էլ ավելի վտանգավոր կլինի շփման գծում ավելի ծանր սպառազինության կիրառման հնարավորության համատեքստում: Մարտի 29-ին կայացած մամուլի ասուլիսի ժամանակ այս մասին ասաց բրիտանացի լրագրող, Քարնեգի հիմնադրամի գիտաշխատող Թոմաս դե Վաալը:
Նրա խոսքով` այսուհանդերձ, ղարաբաղյան խնդրի դիվանագիտական լուծումն այլընտրանք չունի, որի վկայությունն է Վիեննայում ձեռք բերված համաձայնությունը: Նա նշեց, որ այս համաձայնության հիմքում շփման գծում հրադադարի մանդատի ամրապնդման պայմանավորվածությունն էր, եւ սա ինչպես Հայաստանի, այնպես էլ Ադրբեջանի իշխանությունների պահանջն էր. «Սակայն դա չգործեց, եւ համաձայնագիրը չստորագրվեց: Ինչո՞ւ: Ակնհայտ է, որ սխալներ տեղի ունեցան: Անհրաժեշտ է, որ ԵԱՀԿ Մինսկի խմբի երկրներից մեկը տվյալ համաձայնագրի իրականացմանը հասնելու պարտավորություն ստանձնի: Դա ավելի շուտ պետք է ռուսական կողմը լինի` ի դեմս ՌԴ ԱԳ նախարար Սերգեյ Լավրովի: Դրանից զատ, անհրաժեշտ է ամրապնդել ԵԱՀԿ Մինսկի խմբի ձեւաչափը, իսկ համանախագահներն, իրենց հերթին, պետք է վերանայեն Վիեննայի համաձայնությունները, եթե հակամարտության վերսկսում չեն ցանկանում»:
