Մարտի 31-ին արտգործնախարար Էդվարդ Նալբանդյանն ընդունեց ԱՊՀ գործադիր քարտուղար Սերգեյ Լեբեդեւին, ով գլխավորում է ՀՀ խորհրդարանական ընտրություններին ԱՊՀ դիտորդական առաքելությունը:
Ողջունելով հյուրին` նախարար Նալբանդյանը նշեց, որ Հայաստանը, կարեւորելով ԱՊՀ դերակատարությունը անդամ երկրների միջեւ համագործակցության ամրապնդման եւ ընդլայնման գործում, շարունակելու է իր ակտիվ ներգրավվածությունը կազմակերպության գործունեության բոլոր ուղղություններով։
Էդվարդ Նալբանդյանն ու Սերգեյ Լեբեդեւը քննարկեցին առաջիկա խորհրդարանական ընտրություններին դիտորդական առաքելությունների իրականացմանն առնչվող հարցեր։ Այս առումով ԱՊՀ գործադիր քարտուղարը նշեց, որ կազմակերպության հովանու ներքո դիտորդական առաքելություն են իրականացնելու շուրջ 170 դիտորդ, որոնք աշխատելու են Երեւանում եւ բոլոր մարզերում։
ԱՊՀ գործադիր քարտուղարը բարձր գնահատեց Հայաստանի ներգրավվածությունը կազմակերպության աշխատանքներին եւ գոհունակություն հայտնեց Հայաստանի ներկայացուցիչների ու ԱՊՀ գործադիր քարտուղարության միջեւ հաստատված արդյունավետ համագործակցության կապակցությամբ:
Զրուցակիցները քննարկեցին նաեւ ԱՊՀ կազմակերպության կանոնադրական մարմինների առաջիկա նիստերի նախապատրաստական աշխատանքները։
