Գլխավոր դատախազ Արթուր Դավթյանն այսօր՝ ապրիլի 14-ին, ընդունել է ՀՀ-ում ԵՄ պատվիրակության ղեկավար, դեսպան Պյոտր Սվիտալսկիին:
Դատախազության հանրային կապերի բաժնից հայտնում են, որ հանդիպմանը կողմերը քննարկել են ապրիլի 2-ին տեղի ունեցած ՀՀ ԱԺ ընտրությունների նախապատրաստման եւ անցկացման ընթացքում արձանագրված ընտրախախտումների քննությանն առնչվող հարցեր:
Արթուր Դավթյանն ընդգծել է ընտրական տեղամասերում ներդրված տեխնիկական սարքավորումների նշանակությունը հատկապես ընտրախախտումների կանխարգելման ու այդ դեպքերով քննության օբյեկտիվության ու բազմակողմանիության ապահովման առումով:
ԵՄ պատվիրակության ղեկավար Պյոտր Սվիտալսկին բարձր է գնահատել քվեարկությանը նախորդող օրերին, ինչպես նաեւ քվեարկության օրը դատախազության կողմից ընտրախախտումների վերաբերյալ հրապարակումներին արագ արձագանքը, ընտրախախտումների ստուգման աշխատանքների համակարգումը:
ՀՀ-ում ԵՄ պատվիրակության ղեկավարը ներկայացրել է ընտրությունների նախապատրաստման ընթացքում, ինչպես նաեւ քվեարկության օրը ընտրախախտումների վերաբերյալ իր դիտարկումները:
Դեսպանի խնդրանքով գլխավոր դատախազը ներկայացրել է քվեարկության օրը եւ դրան հաջորդող օրերի ընթացքում ուսումնասիրված, առերեւույթ ընտրական իրավախախտումների վերաբերյալ հրապարակումների, ինչպես նաեւ ՀՀ գլխավոր դատախազության թեժ գծով ստացված ահազանգերի վերաբերյալ ուսումնասիրությունների արդյունքները: Գլխավոր դատախազը տեղեկացրել է, որ դատախազությունում ուսումնասիրվել է շուրջ 2500 հրապարակում, 60 ահազանգ, որոնք ստացվել են դատախազության թեժ գծով, ինչպես նաեւ ոստիկանության ստորաբաժանումներում ստացված 309 ահազանգեր:
Նշվել է, որ ինչպես ընտրությունների նախապատրաստման, այնպես էլ` քվեարկության օրվա ընթացքում հրապարակված ընտրական իրավախախտումների վերաբերյալ հաղորդումների ուսումնասիրությունը վկայում է, որ դրանց ճնշող մեծամասնությունը կրել են ընդհանուր, վերացական բնույթ կամ վերաբերել են նախընտրական քարոզչության սահմանված կարգի խախտումներին, քվեարկության կազմակերպմանը վերաբերող տեխնիկական բնույթի խնդիրներին՝ քվեարկության սենյակների կահավորմանը, տեխնիկական սարքավորումների գործարկմանը, տեղամասերում հերթերի, կուտակումների առաջացմանը, տեսանկարահանող սարքերի խափանմանը, տեղամասային հանձնաժողովների աշխատակարգային խախտումներին կամ անորոշ ձեւակերպումներ են պարունակել: 820 դեպքով վարույթ է իրականացվել, որոնցից 720-ում հանցագործության հատկանիշները հերքվել են կամ քրեական գործ հարուցելու հիմքեր ձեռք չեն բերվել: Հարուցվել են 18 քրեական գործեր, որոնցից 7-ն ուղարկվել է դատարան:
Դեսպան Սվիտալսկին շնորհակալություն է հայտնել ՀՀ գլխավոր դատախազին հանգամանալից տեղեկատվության տրամադրման համար:
