Հայ եւ իրանցի ժողովուրդների միջեւ առկա պատմական եւ մշակութային ընդհանրություններն ամուր հիմք են ստեղծում երկու երկրների միջեւ տարբեր բնագավառներում հարաբերությունները զարգացնելու համար: Այս մասին, ապրիլի 16-ին Իրանում ՀՀ դեսպան Արտաշես Թումանյանի հետ հանդիպման ժամանակ նշել է Իրանի մեջլիսի մշակույթի հարցերով հանձնաժողովի նախագահ Նասրօլլահ Փեժմանֆարին:
ԱԳՆ-ից NEWS.am-ին հայտնում են, որ հանձնաժողովի նախագահը, ողջունելով դեսպան Թումանյանին, նշեց, որ հայ եւ իրանցի ժողովուրդների միջեւ առկա պատմական եւ մշակութային ընդհանրություններն ամուր հիմք են ստեղծում երկու երկրների միջեւ տարբեր բնագավառներում հարաբերությունները զարգացնելու համար եւ ընգծեց, որ իր գլխավորած հանձնաժողովը պատրաստ է մեծ աջակցություն ցուցաբերել մշակույթի ոլորտում Հայաստանի հետ համագործակցության խորացման ուղղությամբ։
Իր հերթին դեսպան Թումանյանը գոհունակությամբ նշեց միմյանց մշակութային ժառանգությունների հանդեպ երկու երկրների պետական մարմինների ցուցաբերած մեծ ուշադրությունը, որի վկայությունն է Իրանում հայկական եկեղեցիների եւ մշակութային կոթողների եւ Երեւանում Կապույտ մզկիթի նկատմամբ հոգատար վերաբերմունքը:
Հանդիպմանը քննարկվեցին մշակույթի բնագավառի, ինչպես նաեւ երկու երկրների խորհրդարանների համապատասխան հանձնաժողովների միջեւ հետագա համագործակցության ընդլայնման հարցեր: