Հայաստանի տնտեսական զարգացման եւ ներդրումների նախարարությունում, այսօր՝ ապրիլի 19-ին, տեղի է ունեցել նախարարության եւ Սյունիքի ազատ տնտեսական գոտու կազմակերպիչ ընկերության միջեւ պայմանագրի ստորագրումը:
Պայմանագիրը ստորագրել են նախարար Սուրեն Կարայանն ու «Սյունիքի ազատ տնտեսական գոտի» ՍՊԸ-ի տնօրեն Էդուարդ Ղուկասյանը:
Ստորագրման արարողությունից հետո կայացած ասուլիսում Հայաստանի տնտեսական զարգացման եւ ներդրումների փոխնախարար Հովհաննես Ազիզյանը նշեց, որ Սյունիքի ազատ տնտեսական գոտու կազմակերպչի կողմից առաջին փուլում կիրականացվի 10 մլն դոլարի ներդրում, իսկ ԱՏԳ գործունեության 7-8 տարվա ընթացքում ակնկալվում է, որ կիրականացվեն 120 շահագործող ընկերություններ, որոնք կիրականացնեն 350-400 մլն դոլարի ներդրումներ, կստեղծվեն ավելի քան 2500 աշխատատեղ, իսկ միջին տարեկան արտահանումը կկազմի 80-100 մլն դոլար:
«Ներդրումների քանակով ենթադրում ենք, որ առաջին փուլում մինչեւ հոկտեմբերի 15-ը, այն կհասնի 3 մլն դոլարի: Իսկ հետագա փուլերում 80-100 մլն դոլարի լրացուցիչ ներդրումներ կունենաք Ազատ տնտեսական գոտում։ Մոտ 100 մլն ներդրում է մեր կանխատեսումը»,-ասաց փոխնախարարը՝ հավելելով, որ ԵՏՄ-ում, ընդհանուր առմամբ գոյություն ունի 7 Ազատ տնտեսական գոտի, որից մեկը Սյունիքինն է, իսկ դա թույլ է տալիս տեղում անմաքս առեւտուր իրականացնել։