Իրաքի դաշնային ոստիկանությունը Արեւմտյան Մոսուլի վրա հարձակման ժամանակ չեզոքացրել է «Իսլամական պետություն» ահաբեկչական խմբավորման քիմիական զենքի առաջատար մասնագետներից մեկին։ Այս մասին ասել է ոստիկանության գործողության մասնակից գեներալ Ռայիդ Շաքերը, հաղորդում է «ՏԱՍՍ»-ը։
Նրա տվյալներով՝ ահաբեկիչների ապաստանի գնդակոծության հետեւանքով Էզ-Զանջիլի շրջանում՝ Մոսուլի հին մասում, Տիգրիս գետի արեւմտյան ափին, սպանվել է Աբու Ահմեդ Գազ անունով գրոհայինը, որը պատասխանատու էր ԻՊ-ում քիմիական զենքի կիրառման համար։
CBS հեռուստաալիքը երեքշաբթի օրը հայտարարել է, որ ԻՊ-ն իպրիտ է կիրառել ԱՄՆ-ից եւ Ավստրալիայից զինծառայողների դեմ, որոնք գտնվել են Իրաքի զորամասերից մեկի տարածքում։ Վերջին մի քանի օրվա ընթացքում սա ԻՊ-ի արդեն երկրորդ քիմիական հարձակումն է։ Դրանից մեկ օր առաջ իրաքցի սպան ասել է, որ գրոհայինները քլորի լիցքն ուղղել են Մոսուլի արեւմտյան հատվածի ուղղությամբ։