149 ձերբակալություն 48 ժամում: Այսպիսին են Ինտերպոլի զենքի մաքսանենգությունը կանխող գործողության արդյունքները, որը 23 երկրներում ապրիլի 6-8-ը իրականացրել է Ինտերպոլը: Բացի պայթուցիկ նյութերից ու նռնակներից, առգրավվել է նաեւ 20 հազար զինամթերք եւ 321 միավոր հրազեն, ներառյալ` մեկ հրթիռային սարքավորում, հաղորդում է Euronews-ը:
Զենքի ծագման եւ ձերբակալվածների քաղաքացիության մասին ոչինչ չի ասվում: Սակայն հայտնի է, որ ձերբակալությունների մի մասը տեղի է ունեցել Բալկանյան թերակղզու երկրներում, այդ թվում Բոսնիա եւ Հերցեգովինայի հյուսիսարեւելյան Բրչկո շրջանում: «Հաջողությունը չի չափվում միայն ստուգումների, ձերբակալությունների ու առգրավված զենքի թվով: Ոստիկանության գործողությունները աշխարհի տարբեր երկրներում պետք է ազդանշան ծառայեն հանցագործների համար: Ամբողջ աշխարհում ոստիկանները միավորվում են կազմակերպված հանցագործության դեմ պայքարում», –հայտարարել է Ինտերպոլի Բոսնիայի բյուրոյի տնօրեն Բրանիսլավ Պավլովիչը:
Գործողությանը մասնակցել են մոտ 8 հազար ոստիկաններ` տարբեր երկրներից: Մասնավորապես կիրառվել է iARMS առեւանգված ու կորցրած զենքերի տվյալների բազան:
