ԵԽԽՎ նախագահ Պեդրո Ագրամունտը Վեհաժողովի նիստերի դահլիճ չի վերադարձել գարնանային նստաշրջանի աշխատանքների վերսկսումից հետո, որոնք դադարեցվել էին ՝ Սիրիա նրա գլխավորած պատվիրակության այցելության պատճառով Ագրամունտին անվստահության քվե հայտնելու հարցը քննարկելու առաջարկի կապակցությամբ։ ԵԽԽՎ գլխավոր քարտուղար Վոյցեխ Սավիցկին նշել է, որ «Վեհաժողովը, հաշվի առնելով անդամներից մեկի խնդրանքը, համաձայնում է մի քանի անդամների պահանջով անցկացնել լսումներ, որոնց կարող են ներկա գտնվել ու իրենց բարձրացրած հարցերն ուղղել Վեհաժողովի բոլոր անդամները»։
«Նստաշրջանի սկզբում, ճաշից հետո, ես կտեղեկացնեմ այն մասին, թե որտեղ ու երբ են կայանալու լսումները»,- ասել է նա, չպարզաբանելով, թե եվրախորհրդարանականների հատկապես ինչ հարցերի մասին է խոսքը։
Գարնանային նստաշրջանի հենց սկզբում ԵԽԽՎ նախագահ Պեդրո Ագրամունտը հայտնել էր, որ Սիրիա կատարած այցելությունը սխալ էր։
Վեհաժողովի աշխատակազմում ՌԻԱ Նովոստիի զրուցակիցները, խոսելով իմփիչմենթի մասին, պարզաբանել են, որ «ԵԽԽՎ-ում նման ընթացակարգ գոյություն չունի»։ Հրաժարականի մասին որոշումը պետք է կամավոր հիմունքներով կայացնի ինքը՝ ԵԽԽՎ նախագահը ։
Նշենք, որ ԵԽԽՎ-ում Ուկրաինայի պատվիրակությունը պահանջել է կառույցի նախագահ Պեդրո Ագրամունտի իմփիչմենթի գործընթաց սկսել՝ Սիրիա նրա գլխավորած պատվիրակության այցի պատճառով: Պեդրո Ագրամունտն իր հերթին հայտարարել է, որ Սիրիա իր այցելությունը սխալ էր: Ագրամունտը պարզաբանել է, որ այդ երկիր իր այցը լրատվամիջոցների կողմից շահարկումների առարկա է դարձել, նաեւ նշել, որ իր այցի մասին պարզաբանումներ է ներկայացրել ԵԽԽՎ բյուրոյին:
Նիստի ընթացքում ԵԽԽՎ ղեկավարին հիշեցրել են կոռուպցիոն մի շարք սկանդալների մասին, որոնցում նաեւ նրա անունն է շրջանառվում:
