ԱՄՆ նախագահ Դոնալդ Թրամփը շնորհավորել է Միջազգային տիեզերակայանում գտնվող տիեզերագնաց Պեգգի Ուիթսոնին, որը տիեզերքում անցկացրած օրերի քանակով ռեկորդ է սահմանել։ Նա տիեզերքում է անցկացրել 534 օր, ավելի շատ, քան որեւէ այլ ամերիկացի տիեզերագնաց։ Դոնալդ Թրամփի ու նրա դստեր՝ Իվանկայի զրույցը Պեգգի Ուիթսոնի հետ անցնում է տեսակոնֆերենցիայի ռեժիմով, հայտնում է «Ամերիկայի ձայնը»։
«534 օր․․Անհավանական ռեկորդ է,- ասել է Թրամփը,-Մեր երկրի անունից, իսկ անկեղծ ասած՝ ամբողջ աշխարհի անունից, ես ուզում եմ շնորհավորել ձեզ»,- ասել է նա։
57-ամյա Ուիթսոնը ամենափորձառու ամերիկացի կին տիեզերագնացն է; Նա պետք է երկիր վերադառնա սեպտեմբերին, երբ կլրանա տիեզերքում մնալու 666 օրը։ Այդ օրերը ներառում են դեպի տիեզերք նրա երեք ուղևորությունները։
Հիմա Պեգգի Ուիթսոնը ղեկավարում է միջազգային տիեզերական անձնակազմը, որի կազմում են ամերիկացի տիեզերագնաց Ֆիշերը, ֆրանսիացի Պեկեն ու ռուսաստանցիներ Նովիցկին ու Յուրչիխինը։