Թուրքիայի ոստիկանությունն ավելի քան հազար մարդու է ձերբակալել «Հիզմեթ» շարժման գաղափարախոս Ֆեթուլլահ Գյուլենի հետ կապերի կասկածանքով, ում իշխանությունները մեղադրում են անցյալ տարի պետական հեղաշրջման անհաջող փորձի մեջ, փոխանցում է BBC-ն:
Լրատվամիջոցների տեղեկություններով՝ կալանավորման ավելի քան 3 հազար օրդեր է տրվել: Ամբողջ Թուրքիայում անցկացված շուրջկալների գլխավոր թիրախը ոստիկանության աշխատակիցներն են, որոնց իշխանությունները մեղադրում են Միացյալ Նահանգներում բնակվող Գյուլենին աջակցելու մեջ:
Գյուլենը, որին իշխանությունները մեղադրում են խռովության կազմակերպման մեջ, մի քանի անգամ հրապարակայնորեն ժխտել է իր մասնակցությունը հեղաշրջման փորձին եւ դատապարտել է դրա մասնակիցներին: Սակայն խռովությունից հետո Թուրքիայի իշխանությունները զանգվածային զտումներ են սկսել, որոնք մինչ օրս չեն դադարում:
Ավելի քան 80 հազար մարդ, որոնց թվում զինվորականներ, դատավորներ, համալսարանների դեկաններ եւ դասախոսներ, լրագրողներ իրենց պաշտոններից զրկվել են Գյուլենին աջակցելու կասկածանքով: Փակվել են ավելի քան 2 հազար կազմակերպություններ, կալանավորվել է ավելի քան 40 հազար մարդ:
Նախօրեին Եվրոպայի խորհրդի Խորհրդարանական վեհաժողովը հեղաշրջման փորձին Թուրքիայի իշխանությունների արձագանքը քննադատել է որպես անհամաչափ եւ հայտարարել, որ վերականգնում է երկրի իրավիճակի մոնիթորինգը: