«Հաց բերող» անունով հայտնի Արթուր Սարգսյանի մայրն ուզում է նրա շիրիմը Շահումյանի գերեզմանատնից տեղափոխել Արարատի մարզի Բյուրավան գյուղի գերեզմանատուն: NEWS.am-հետ զրույցում նրա հարազատներից Էվելինա Ղամալյանը նշեց, որ Արթուր Սարգսյանի մայրը չի կարողանում ամեն օր Արարատի մարզից գալ Երեւան՝ որդու գերեզմանին եւ հենց այդ պատճառով էլ նման որոշում է կայացրել:
«Շատ դժվար է նրա համար, մենք բոլորս պետք է հարգենք մոր որոշումը, որովհետեւ իր որդին է եւ պետք է Արթուր Սարգսյանը թաղվի այնտեղ, որտեղ իր հարազատներն են»,-ասաց նա՝ նշելով, որ երբ որոշում է կայացվել Արթուր Սարգսյանին Շահումյանի գերեզմանատանը թաղելու, մայրը շատ թույլ է եղել, սգի մեջ եւ իր կարծիքը չի հայտնել:
Նշենք, որ Արթուր Սարգսյանին ցանկանում էին թաղել «Եռաբլուր» զինվորական պանթեոնում, սակայն, թույլտվություն չստանալուց հետո նրա հարազատները որոշում կայացրին հողին հանձնել Շահումյանի գերեզմանատանը՝ բետոնապատ փոսում՝ հետագայում «Եռաբլուր» տեղափոխելու նպատակով:
Հիշեցնենք, որ «Սասնա ծռերին» օժանդակելու մեջ մեղադրվող Արթուր Սարգսյանը՝ «Հաց բերողը», մարտի 16-ին մահացել էր «Արմենիա» բժշկական կենտրոնում:
Արթուր Սարգսյանը 2016 թվականի ամռանը ոստիկանության Երեւանի ՊՊԾ գնդի տարածքը գրավելու օրերին կրակահերթերի տակ ավտոմեքենայով ճեղքել էր ոստիկանական պատն ու սնունդ տարել «Սասնա ծռեր» զինված խմբին։