Պաշտոնավարման երկրորդ ժամկետի համար նախագահական ընտրություններում իր թեկնածությունն առաջադրած Իրանի նախագահ Հասան Ռոհանիի վարկանիշը նվազել է մայիսի 12-ին տեղի ունեցած հեռուստաբանվեճից հետո: Այս մասին հաղորդում է «ՏԱՍՍ»-ը` վկայակոչելով Tasnim գործակալությանը:
Նշվում է, որ հեռուստաբանավեճին հետեւած իրանցի ընտրողները կարծում են, որ Ռոհանին եւ փոխնախագահ Էսհակ Ջահանգիրին պակաս համոզիչ էին, քան նրանց հակառակորդները` երկրի նախկին գլխավոր դատախազ Էբրահիմ Ռայիսին եւ մայրաքաղաք Թեհրանի քաղաքապետ Մոհամադ Բագեր Գալիբաֆը, նշում է գործակալությունը: Գործակալության տվյալներով` իր հասցեին հնչած քննադատություններին նախագահի պատասխանները «բացասական են ազդել հասարակական կարծիքի վրա եւ հանգեցրել վարկանիշի նվազեցման»:
Մայիսի 12-ին տեղի ունեցած թեկնածուների հեռուստաբանավեճի երրորդ ու եզրափակիչ փուլի ընթացքում նախագահի թկնածուները միմյանց փոխադարձաբար մեղադրել են կոռուպցիայի մեջ: Մասնավորապես, մայրաքաղաքի քաղաքապետը գործադիր իշխանության ղեկավարին եւ նրա առաջին տեղակալին մեղադրել է չնչին գներով հողամասեր գնելու մեջ:
Իրանում նախագահական ընտրությունները տեղի կունենան մայիսի 19-ին:
