ԵԱՀԿ Մինսկի խումբն Ադրբեջանին ագրեսոր ճանաչեց Հայաստանում ժողովրդավարության զարգացման շնորհիվ: ՀՀ Ազգային ժողովի մայիսի 19-ի նիստում այս մասին հայտարարեց ԱԺ խոսնակ Արա Բաբլոյանը՝ մեկնաբանելով շփման գծում տեղի ունեցած միջադեպի հետ կապված ԵԱՀԿ Մինսկի խմբի վերջին հայտարարությունը:
«Հարկավոր է ճիշտ գնահատել այս քայլը: Այս հայտարարությանը հանգեցրեց ոչ միայն Ադրբեջանի մշտական ագրեսիան, այլեւ, կարելի է վստահաբար ասել, ժողովրդավարության զարգացմանն ուղղված Հայաստանի հստակ քայլերը: Լինելով ԵՏՄ անդամ՝ Հայաստանը ձգտում է ընդլայնել համագործակցությունը նաեւ այլ երկրների եւ տարածաշրջանների հետ, այդ թվում՝ Եվրոպայի»,- նշեց Բաբլոյանը:
Հիշեցնենք, որ ԵԱՀԿ Մինսկի խմբի համանախագահները դատապարտել են ղարաբաղյան հակամարտության գոտու շփման գծում հրադադարի ռեժիմի վերջին խախտումները եւ կողմերին կոչ են արել անհրաժեշտ քայլեր ձեռնարկել՝ հակամարտության գոտում իրադրության հետագա սրումը կանխելու համար:
«Բազմաթիվ հավաստի աղբյուրներից հավաքված տեղեկատվության համաձայն՝ Ադրբեջանը մայիսի 15-ին շփման գծում հրթիռ է արձակել՝ ոչնչացնելով ռազմական տեխնիկա։ Մայիսի 16-ի երեկոյան եւ հաջորդ օրը հայկական զինված ուժերը պատասխանել են տարբեր տրամաչափի ականանետային կրակահերթերով։ Երկու կողմերի նման գործողությունները հրադադարի ռեժիմի զգալի խախտում եւ տագնապի առիթ են»,- ասված է եռանախագահների հայտարարությունում: