Հայաստանում պետք է մասնավոր նախաձեռնություններն ընդլայնել քաղաքացիների եկամտի աճի համար: Մայիսի 23-ին՝ լրագրողների հետ հանդիպման ժամանակ այս մասին ասաց հանրապետական պատգամավոր, Տնտեսական հարցերով ԱԺ հանձնաժողովի նախագահ Խոսրով Հարությունյանը:
Նրա կարծիքով՝ աղքատությունը հաղթահարելու միակ ուղին առավելագույն աջակցությունն է մասնավոր նախաձեռնությունների զարգացմանը եւ քաղաքացիների եկամուտների աճին օգնելը: Անհրաժեշտ է զարգացնել ոչ միայն քաղաքացիական, այլ նաեւ պաշտպանական արդյունաբերությունը: Այս կերպ բանակի ծախսերը նույնպես արդյունաբերության մեջ ներդրումներ կդառնան: «Դրանից բացի՝ անհրաժեշտ է մասնավոր ներդրողներին ակտիվորեն գրավել: Դրա համար պայմաններ կան՝ անդամակցությունը Եվրասիական տնտեսական միությանը, նաեւ Եվրամիության հետ GSP+ առեւտրի արտոնությունների մասին համաձայնագիրը: Այս համաձայնագրերը պետք է մասնավոր ներդրողների համար գրավիչ լինեն: Մնում է նրանց գրավել, ըստ որում՝ նաեւ դիվանագիտական կապերի միջոցով»,- նշեց Հարությունյանը:
