Հայաստանի համար շատ կարեւոր է ՀԱՊԿ-ի ռազմական բաղադրիչի զարգացումը: Մայիսի 23-ին՝ լրագրողների հետ զրույցում այս մասին ասաց Պաշտպանության նախարարության Պաշտպանական վարչության պետ Լեւոն Այվազյանը:
Անդրադառնալով ՀԱՊԿ գլխավոր քարտուղարի պաշտոնում ՀՀ ԶՈւ Գլխավոր շտաբի նախկին պետ Յուրի Խաչատուրովի նշանակմանը՝ նա նշեց. «Իհարկե, ցանկացած պետության ներկայացուցչի նշանակումը ցանկացած միջազգային կազմակերպության գլխավոր քարտուղարի պաշտոնում երկրի դերն ու հեղինակությունն այդ կազմակերպությունում մեծացնում է: Սակայն պետք է հաշվի առնել, որ ՀԱՊԿ գլխավոր քարտուղարի պաշտոնը միջազգային պաշտոն է, եւ նա պետք է առաջին հերթին առաջ մղի ոչ միայն Հայաստանի համընդհանուր շահերն ու խնդիրները, այլ նաեւ ՀԱՊԿ-ի: Հակառակ դեպքում նույն բանը կստացվեր, եթե, օրինակ, ՆԱՏՕ-ի գլխավոր քարտուղար Յենս Ստոլտենբերգը ելակետ ընդուներ միայն Նորվեգիայի շահերը»:
Այվազյանի խոսքով՝ ՀԱՊԿ շրջանակում Հայաստանի ազգային շահերը ենթադրում են Կազմակերպության միջազգային դերի բարձրացում, ռազմական կառավարման համակարգի կատարելագործում, որպեսզի ռազմական բաղադրիչն ավելի գործուն լինի: «Այս ուղղությամբ պետք է դեռեւս շատ աշխատանք կատարել: Ջանքեր են գործադրվում, որ ՀԱՊԿ մեխանիզմները ավելի գործուն դառնան եւ կոնկրետ պահին կոնկրետ խնդիրներ լուծեն: Սա, իհարկե, բարդ է, քանի որ ՀԱՊԿ շրջանակում որոշումներն ընդունվում են կոնսենսուսի հիմքով: Ցանկացած միջազգային կազմակերպության շրջանակում իրենց զգացնել են տալիս նաեւ ազգային շահերը, որոնք երբեմն չեն համընկնում: Սա նորմալ երեւույթ է»,- հավելեց Լեւոն Այվազյանը:
