Հայաստանի նախկին փոխվարչապետ եւ պաշտպանության նախկին փոխնախարար, «Նորք-Մարաշի» զինված խմբի գործով ամբաստանյալ Վահան Շիրխանյանի առողջական վիճակը համեմատաբար կայունացել է: Այս մասին NEWS.am-ի հետ զրույցում ասաց նրա շահերի պաշտպան Հայկ Ալումյանը: Նա նշեց, որ իր պաշտպանյալն այժմ իրեն ավելի լավ է զգում, քան առաջ:
Վահան Շիրխանյանը հետազոտությունների էր ենթարկվել, որոնց արդյունքների համաձայն նա ունի ողնաշարի դեգեներատիվ փոփոխություններ` փոքրիկ ճողվածքներ, ստորին վերջույթների տրոմբոֆլեբիտ սինդրոմ մասնակի վերաանոթավորմամբ:
Վահան Շիրխանյանի պաշտպանը բազմաթիվ անգամ հայտարարել է, որ իր պաշտպանյալի առողջական վիճակը գնալով վատանում է: Դատարանի որոշմամբ Վահան Շիրխանյանի նկատմամբ դատաբժշկական փորձաքննություն է նշանակվել, որի արդյունքները դեռ պարզ չեն:
Մարդու իրավունքների եվրոպական դատարանը (ՄԻԵԴ) Հայաստանի կառավարությանը հարցեր է ուղղել՝ կապված պաշտպանության նախկին փոխնախարար Վահան Շիրխանյանի առողջության հետ:
Հիշեցնենք, որ Վահան Շիրխանյանը ձերբակալվել է 2015թ.-ի դեկտեմբերի 21-ին Նորք-Մարաշում զինված խմբավորման վնասազերծման գործի շրջանակում: Նա մեղադրվում է խմբավորման ղեկավար Արթուր Վարդանյանի հետ համագործակցության մեջ: 2016-ի սեպտեմբերին քննչական մարմինը Վահան Շիրխանյանին նոր մեղադրանք առաջադրեց՝ իշխանության գրավման նախապատրաստում:
