British Airways ավիաընկերությունը թռիչքները մասամբ վերականգնում է, սակայն զգուշացնում է, որ չվերթների ուշացում կամ նույնիսկ չեղարկում տեղի կունենա, մինչեւ ընկերությունը լիովին վերադառնա աշխատանքի հաստիքային ռեժիմին, փոխանցում է BBC-ն:
Շաբաթ օրը ավիաընկերությունը «Հիթրու» եւ «Գաթվիք» օդանավակայաններից բոլոր չվերթները չեղյալ էր համարել իր համակարգչային համակարգում ծավալուն խափանման պատճառով: Հազարավոր ուղեւորներ չէին կարողացել նշանակման վայր հասնել: Նրանց, ում հաջողվել էր ուրիշ ավիաընկերությունների չվերթներով ուղարկել, ստիպված էին առանց ուղեբեռի ճամփորդել: British Airways-ի աշխատանքում խնդիրները համընկել են Բրիտանիայում դպրոցական մեկշաբաթյա արձակուրդի սկզբին:
Ավիաընկերությունը պատրաստ է ուղեւորներին փոխհատուցում վճարել եւ ցանկացողներին օգնել առաջիկա օրերին այլ չվերթներով մեկնել:
Ավիաընկերության ներկայացուցիչները հայտարարել են, որ ավիափոխադրողը դեռեւս 2 օր էլ չի կարողանա աշխատանքի նախկին ժամանակացույցին վերադառնալ, այդ պատճառով ուղեւորներին խորհուրդ են տալիս օդանավակայան ուղեւորվելուց առաջ համացանցում ստուգել չվերթի կարգավիճակը:
British Airways-ի համակարգչային համակարգում խափանման պատճառը էլեկտրամատակարարման ընդհատումն են համարում: Կիբերհարձակման տարբերակը չի դիտարկվում:
