Ոչ միայն պետք է թարմացնել վագոնները, այլեւ մեծացնել փոխադրման արագությունը, ներդնել նոր տեխնոլոգիաներ: Այս մասին, այսօր՝ մայիսի 29-ին, հայկական երկաթուղու հավատարմագրային կառավարումն ստանձնած «Ռուսական երկաթուղիներ» ԲԲ ընկերության առաջին փոխնախագահ Ալեքսանդր Միշարինի եւ «Հարավկովկասյան երկաթուղի» ՓԲ ընկերության տնօրեն Սերգեյ Վալկոյի հետ հանդիպման ժամանակ նշել է ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը:
Նախարարությունից NEWS.am-ին հայտնում են, որ նախարարը, ողջունելով հյուրերին, ընդգծեց, որ Հայաստանի կառավարությունը պատրաստ է լսել ընկերության բոլոր առաջարկությունները եւ աջակցություն ցուցաբերել ցանկացած հարցի շուրջ:
Ալեքսանդր Միշարինն իր հերթին նշեց, որ գնահատում է նախարարության եւ «Հարավկովկասյան երկաթուղու» միջեւ ձեւավորված ամուր գործընկերային կապը:
Անդրադառնալով ուղեւորափոխադրումներին` Վահան Մարտիրոսյանը հատուկ ընդգծեց սպասարկման որակի բարձրացման կարեւորությունը` նշելով, որ խոսքը ոչ միայն վագոնների թարմացման, այլեւ փոխադրման արագությունը մեծացնելու, նոր տեխնոլոգիաներ ներդնելու մասին է:
«Ռուսական երկաթուղիներ» ԲԲ ընկերության առաջին փոխնախագահը ասաց, որ ընկերության աշխատանքի նոր ռազմավարության մշակման ընթացքում նախատեսում են ավելի մեծ ուշադրություն դարձնել ուղեւորափոխադրմանը: Ըստ նրա՝ իրենց համար եւս ուղեւորների սպասարկման որակի բարձրացումն առաջնահերթ է:
Ալեքսանդր Միշարինը հայտնեց, որ ընկերությունը քննարկում է շարժակազմը 2 նոր էլէկտրագնացքով համալրելու հնարավորությունը:
Նա նախարարին ներկայացրեց ընկերության` նախորդ տարվա աշխատանքներն ու ներդրումային ծրագիրը, ամփոփեց այս տարվա առաջին եռամսյակի ծրագրերը: Ա. Միշարինը կարեւորեց նախկինում հատկապես ենթակառուցվածքների զարգացմանն ուղղված ներդրումները` վստահություն հայտնելով, որ այդ աշխատանքը կլինի շարունակական:
Նախարարը, անդրադառնալով «Հարավկովկասյան երկաթուղու» գործուն մասնակցությամբ իրականացվող մուլտիմոդալ բեռնափոխադրման պիլոտային ծրագրի հաջող մեկնարկին, ներկայացրեց ձեռք բերված հաջողությունները եւ հույս հայտնեց, որ մինչեւ տարեվերջ զգալի ծավալային աճ կգրանցվի:
«Ռուսական երկաթուղիներ» ընկերության ներկայացուցիչը նշեց, որ ներկայում ամենուր երկաթուղով բեռնափոխադրումների աճի մեծ միտում կա, եւ կարծում է, որ այդ առումով Հայաստանի` որպես տարանցիկ երկրի, պոտենցիալը շատ բարձր է:
